ललितपुर । सरकारले ललितपुरमा देखिएका कोरोना संक्रमित व्यक्तिहरुको तथ्यांक लुकाएको पाइएको छ ।
जिल्लामा बिहीबार एकैदिन १८ जना संक्रमित पुष्टि भएको थियो । तर, स्वास्थ्य तथा जनसंख्या मन्त्रालयलेले विहीबार गरेको नियमित पत्रकार सम्मेलनमा सो जानकारी दिइएको थिएन । मन्त्रालयले बिहीबार ललितपुरमा कुनै संक्रमित फेला नपरेको जनाएको थियो ।
पछिल्लो २४ घण्टामा थप भएका संक्रमितको बारेमा मात्रै जानकारी दिने र मन्त्रालयमा विवरण प्राप्त नभएको हुनसक्ने मन्त्रालयका प्रवक्ता प्रा. डा. जागेश्वर गौतमले बताए ।
महालक्ष्मी नगरपालिको लुभु, टीकाथली, इमाडोल, सिद्धिपुर लगायतका स्थानमा १२ जना कोरोना संक्रमित भेटिएको विवरण दैनिकीन्युजले विहीबार नै फेला पारेको थियो ।
यस्तै ललितपुर महानगरपालिकामा २ जनामा पनि कोरोना संक्रमण पुष्टि भएको थियो ।
उता इमाडोलमा रहेको किस्ट मेडिकल कलेज, अस्पतालमा रहेका ४ जनामा कोरोना संक्रमण रहेको र उनीहरुलाई आइसोलेसनमा उपचार गरिएको अस्पताल स्रोतले पुष्टि गरेको थियो । उनीहरु सबैको संक्रमण पुष्टि बुधबार बेलुका नै भएको र सोबारे मन्त्रालयलाई जानकारी गराएर विहीबार ९ बजे सम्बन्धित व्यक्तिको आफन्तलाई समेत खबर गराइसकिएको प्रहरी उच्च स्रोतले जनायो ।
पाटन अस्पतालमा उपचाररत सिन्धुपाल्चोकका एक युवाको मृत्यु भएको र उनमा कोरोना संक्रमण रहेको विवरण पनि मन्त्रालयले सार्वजनिक गरेको छैन ।
पछिल्ला दिन जिल्लामा संक्रमितको संख्या ह्वात्तै बढेको पाटन अस्पतालका निर्देशक डा. विष्णु शर्माले बताए ।
संख्या ह्वात्तै बढेको छ, कोभिड पोजिटिभ केस देखिएको विवरण हामीले क्वीक मन्त्रालयलाई अपडेट गराउँछौं, शर्माले भने ।
विहीबार एकैदिन देखिएका १८ जना संक्रमितको विवरण मन्त्रालयले सार्वजनिक नगरेपछि उनीहरुका आफन्त भने तनावमा छन् । अस्पतालले पोजिटिभ देखियो भनेर आइसोलेसनमा राखेको छ, कोरोना संक्रमतिका एक आफन्तले भने, अहिलेसम्म मन्त्रालयले पुष्टि गरेको छैन, हामीलाई यथार्थ कुरा थाहा नपाएर थप तनाव भयो ।
यसअघि पनि वागमती गाउँपालिकाका एक युवामा संक्रमण देखिएको मन्त्रालयले सार्वजनिक गरेको थिएन उनी अहिले आइसोलेसनमा छन् ।
यो पनि पढ्नुहोस
महालक्ष्मी नगरपालिका ललितपुरको कोरोनाको हटस्पट, आज १२ जना देखिए
किस्ट अस्पतालका चार जना विरामीमा देखियो कोरोना, संक्रमित सबै ललितपुरका (सूचिसहित)
