ललितपुर । कोरोना संक्रमण (कोभिड–१९) बाट ललितपुरमा एक जनाको मृत्यु भएको छ। स्वास्थ्य कार्यालय ललितपुरका प्रमुख डा. खगेश्वर गेलालका अनुसार चितवन जिल्ला रत्ननगर स्थायी घर भई हाल महालक्ष्मी नगरपालिका ५ टीकाथली बस्ने उनको बिहीवार (आज) पाटन अस्पतालमा उपचार कै क्रममा मृत्यु भएको हो। ५० वर्षका ती व्यक्तिमा असार ४ गते कोरोना पुष्टि भएको थियो । उनी मिर्गौला सम्बन्धि रोगबाट पिडित थिए ।
५ महिना अगाडि भक्तपुर हस्पिटलमा उनको मिर्गौला ट्रान्सप्लान्ट गरिएको थियो । असार ४ गते स्वास्थ्यमा समस्या आएपछि उनी नर्भिक हस्पिटल भर्ना भएका थिए । तर, ज्वरो आएको कारण स्वाव संकलन गरेर पिसिआर परिक्षण गराउँदा ती व्यक्तिमा कोरोना भाइरस संक्रमण पुष्टि भएको थियो । कोरोना पुष्टि भएपछि उनको पाटन अस्पतालको आइसोलेसन वार्डमा उपचार हुँदै थियो । ु‘उपचारकै क्रममा निजको मृत्यु भएको हो’ डाक्टर गेलालले भने, ‘उहाँमा अन्य रोगको संक्रमण पनि रहेछ ।’ अस्पतालको भेन्टिलेटर वा आइसियु कहाँ राखिएको उनले खुलाएनन् । निजको शव व्यवस्थापन कार्य नेपाली सेनाले गरिरहेको छ।
यसअघि ललितपुर बुङमतिका ५७ वर्षीय एक पुरुषको पनि कोरोना कै कारण मृत्यु भएको थियो । ती व्यक्तिको ललितपुर इमाडोलमा रहेको किस्ट मेडिकल कलेज, अस्पतालमा उपचारका क्रमम मृत्यु भएको थियो । ललितपुरमा कोरोनाबाट मृत्यु हुने सङ्ख्या २ पुगेको छ । यस्तै ८ जनामा संक्रमण पुष्टि भएको छ । बिहीबार बिहान १८ र ३३ वर्षका दुई जना युवामा संक्रमण पुष्टि भएको थियो ।
