काठमाडौं । राजेन्द्र लिङदेनसँग अध्यक्षमा पराजित राष्ट्रिय प्रजातन्त्र पार्टी (राप्रपा) नेता कमल थापाले मतदानका बेला पुर्वराजा ज्ञानेन्द्र शाहले गरेको हस्तक्षेप छानविन गर्न माग गरेका छन् । अध्यक्ष लिङ्देनलाई सोमबार पत्र लेखेर पार्टीको महाधिवेशनमा पूर्वराजाको हस्तक्षेपबारे छानबिन गर्न माग गरेका हुन् । ‘पार्टी नेतृत्वको निर्वाचनमा पूर्वराजा र निर्मल निवासको हस्तक्षेपबारे छानबिन गर्न निष्पक्ष छानविन समिति बनाउनुहोस् । हस्तक्षेपत्रको भर्त्सना गर्नुहोस्,' थापाले लेखेका छन्, 'भविष्यमा हस्तक्षेप नहुने सुनिश्चित गर्नुहोस् । राजसंस्थाका बारेमा र पार्टीलाई रिमोट कन्ट्रोलबाट चलाउन चाहने निर्मल निवासको योजनाका बारेमा पार्टीत्रि बहस शुरु गर्नुहोस् ।’
अध्यक्ष लिङ्देनले आफ्नो मागअनुसार गरेमा राप्रपाको भविष्य सुनिश्चित रहने थापाले उल्लेख गरेका छन्। पार्टीको बृहत्तर हित र एकताको पक्षमा आफू मन वचन र कर्मले प्रतिवद्ध रहेको बताउँदै थापाले आफ्नो रगत-पसिना बगेको राप्रपाको माया र हजारौँ कार्यकर्ताको भविष्यको चिन्ता रहेको पनि बताएका छन्।
