काठमाडौं । प्रधानमन्त्री केपी शर्मा ओली प्रतिनिधि सभाको विशेष अधिवेशनमार्फत विश्वासको मत लिनबाट असफल भएका छन् । संविधानको धारा १ सयको उपधारा १ बमोजिम उनले संसदमार्फत विश्वासको मत लिन असफल भएको हो ।
बैठकमा जम्मा खसेको २ सय ३२ मतमध्ये प्रधानमन्त्री ओलीले ९३ मत प्राप्त गरेका छन् । यस्तै विपक्षमा १ सय २४ जनाले मत हालेका छन् भने १५ जना तटस्थ बसेका छन् ।
प्रधानमन्त्री ओलीको दल नेकपा एमालेका १ सय २१ सांसद भए पनि माधव कुमार नेपाल–झलनाथ खनाल समूहका सांसदहरू भने आजको बैठकमा अनुपस्थित थिए ।
तत्काल कायम रहेको सदस्य सङ्ख्याको बहुमत नपुगेपछि प्रधानमन्त्री ओलीको विश्वासको मत लिने प्रयास असफल भएको सभामुख अग्निप्रसाद सापकोटाले घोषणा गरे ।
प्रधानमन्त्रीको विश्वासको प्रस्ताव पारित हुन अहिले संसदमा कायम रहेको दुई सय ७१ सदस्यको बहुमत अर्थात् एक सय ३६ मत प्राप्त गर्न आवश्यक पर्थ्या । मत बराबर भएका खण्डमा सभामुखले निर्णायक मत दिन सक्ने व्यवस्था छ । प्रस्तावमा सभामुखबाहेक दुई सय ६६ सांसदले मत जाहेर गर्न सक्ने अधिकार थियो ।
एमालेका १ सय २१, माओवादी केन्द्रका ४८, कांग्रेसका ६१, जसपाका ३२ तथा राष्ट्रिय जनमोर्चा, नेपाल मजदुर किसान पार्टी, राष्ट्रिय प्रजातन्त्र पार्टी र स्वतन्त्र एक सांसदलाई मताधिकार थियो ।
