पोखरा । नेकपा एमालेको झलनाथ खनाल–माधवकुमार नेपाल समूहले गण्डकी प्रदेशबाट छुट्टै पार्टी बनाउन सुरु गरेको छ । बिहीबार पोखराको लेकसाइडमा भएको कार्यक्रममा सुरेन्द्र पाण्डेको संयोजकत्वमा २२ सदस्यीय समानान्तर कमिटी घोषणा गरिएको हो । वरिष्ठ नेता नेपालले कमिटी घोषण गरेका हुन् । नेपालको प्रमुख आतिथ्यता र सुरेन्द्र पाण्डेको अध्यक्षतामा बसेको प्रदेश भेलामा प्रदेशका ९ वटै जिल्लाको समानान्तर कमिटी पनि घोषणा गरियो । कास्कीमा धनराज अचार्यलाई अध्यक्ष र सचिवमा होमबहादुर नेपालीलाई जिम्मेवारी दिइएको छ । यसैगरी, स्याङ्जाको अध्यक्षमा रामचन्द्र भट्टराई र सचिवमा भुपराज अधिकारी रहेका छन् । म्याग्दीमा अध्यक्ष बालकृष्ण सुवेदी, बागलुङमा इन्द्रलाल सापकोटा अध्यक्ष र लालबहादुर थापा सचिव, पर्वतमा भक्त कुँवर अध्यक्ष र पदमपाणी शर्मा सचिव, तनहुँमा शंकनारायण क्षेष्ठ अध्यक्ष र श्रीराम कार्की सचिव रहेका छन् भने गोरखामा यादव बस्नेत अध्यक्ष र सानोमाया बस्नेत सचिव रहेका छन् । नवलपुर र लमजुङ अध्यक्ष र सचिवले नाम सार्वजानिक गर्न मानेनन् । उनीहरुले छुट्टै घोषण कार्यक्रम आयोजना गरेर नाम सार्वजानिक गर्ने बताएका छन् । हिमालपारिका जिल्ला मनाङ र मुस्ताङमा भने कमिटी गठन गर्न बाँकी छ । चैत २९ अघि नै सबै जिल्लामा समानान्तर कमिटी घोषणको कार्यक्रम सम्पन्न हुने स्याङ्जाका अध्यक्ष रामचन्द्र भट्टराईले जानकारी दिए । उनका अनुसार भेलामा ११ वटै जिल्लाका नेता तथा कार्यकर्ताको उपस्थिति थियो भने, सबै जिल्लाका सचिवालय सदस्य पनि सहभागी थिए ।