ललितपुर । संसदको प्रमुख प्रतिपक्षी दल कांग्रेसको सूचना, सञ्चार तथा प्रचार विभागले पार्टीलाई प्रविधिमैत्री (डिजिटलाइज्ड) बनाउने निर्णय गरेको छ । पार्टी प्रवक्तासमेत रहेका विश्वप्रकाश शर्मा अध्यक्ष रहेको विभागको २० र २१ गते बसेको बैठकले पार्टीलाई प्रविधिमैत्री बनाउने सम्बन्धी विभिन्न ९ निर्णय गरेको हो ।
जुम मार्फत भएको भर्चुअल बैठकको निर्णयमा भनिएको छ, नीति बमोजिम नेपाली कांग्रेसलाई सूचना, सञ्चार र प्रचारको क्षेत्रमा आधुनिक प्रविधिमैत्री (डिजिटलाइज्ड) बनाउँदै अघि बढ्ने अभियान सुरूवात गर्ने । उक्त निर्णयको कार्यान्वयन स्वरुप पहिलो काम पार्टीको आधिकारीक वेबसाइटलाई आधुनिक बनाउने बताइएको छ ।
विभाग गठन हुनुपहिलेदेखि आन्तरिक रूपमा क्रियाशिल रहेको ‘कांग्रेस सूचना नेटवर्क’ मा विषयगत योग्यताका कार्यकर्तालाई थप समाविष्ट गर्दै विभागमा रहेकाको प्रदेश स्तरीय एवं विषयगत जिम्मेवारी व्यवस्थापन गर्ने निर्णय पनि भएको छ ।
विषयगत अध्ययन र अवधारणा निर्माण उपसमिति एवं सामाजिक सञ्जाल केन्द्रित उपसमिति गठन गरेर सामाजिक सञ्जालमा अभिव्यक्त हुने भावना र विचार समेतलाई आत्मसात गर्दै विभागको सार्वजनिक प्रस्तुतिलाई सैद्धान्तिक र व्यवहारिक दुवै कोणबाट सबल बनाउने निर्णय बैठकले गरेको छ,निर्णयमा लेखिएको छ ।
कोभिड सम्बन्धित उपसमितिको संयोजक नेपाल मेडिकल एसोसिएसनका पूर्व राष्ट्रिय अध्यक्ष एवं विभागका सदस्य डा. अन्जनी झालाई दिइएको छ ।
विभागको सो बैठकले कांग्रेसको मुखपत्र नेपाल पुकारलाई प्रिन्ट र डिजिटल दुवै माध्यममा प्रकाशन गर्ने निर्णय गरेको प्रवक्ता शर्माले जानकारी दिए ।
