काठमाडौं । नेपालमा कोरोनाबाट मृत्यु हुनेको संख्या दैनिक बढिरहेको छ । पछिल्ला हप्तादेखि मृतकको संख्या ह्वात्तै बढिरहेको स्वास्थ्य तथा जनसंख्या मन्त्रालयले जनाएको छ । पछिल्लो २४ घण्टामा मात्र कोरोना भाइरसको कारण १२ जनाको मृत्यु भएको छ । यो संख्या समेत थप गर्दा नेपालमा कोरोनाबाट मृत्यु हुनेको संख्या २०७ पुगेको छ ।
मृत्यु हुनेमा ३ महिला र ९ जना पुरुष रहेको शनिबारको स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्राडा जागेश्वर गौतमले जानकारी दिए । प्रवक्ता गौतमका अनुसार पाल्पाकी ३०, काठमाडौँकी ५१ र भक्तपुरकी ६२ वर्षीया महिलाको कोरोना संक्रमणबाट मृत्यु भएको हो। त्यस्तै पर्साका ४८, ३९, सिरहा ८४, गोरखामा ३८, काठमाडौँमा ८३, ललितपुरमा ७२ र ६१, भक्तपुरमा ८२ र कास्कीका ५८ वर्षीय पुरुषको पनि संक्रमणबाट निधन भएको हो।
कोरोनाबाट मृत्यु हुनेको प्रतिशत संक्रमितमध्ये ०.५५ प्रतिशत रहेको प्रवक्ता गौतमले बताए।
