काठमाडौं । नेपालमा कोरोनाको कारण मृत्युदर ह्वात्तै बढ्न थालेको छ । स्वास्थ्य तथा जनसंख्या मन्त्रालयका अनुसार जेठ ३ गतेदेखि भदौ ७ गतेसम्म आइपुग्दा १ सय ४६ जनाको कोरोना संक्रमणकै कारण मृत्यु भएको छ । मृतकमध्ये अधिकांसलाई अन्य रोगको संक्रमण रहेको र त्यसमा कोरोना पोजिटिभ पनि देखिएको छ । कोरोना संक्रमणबाट पछिल्लो २४ घन्टामा मात्रै ९ जनाको मृत्यु भएको छ । स्वास्थ्य तथा जनसंख्या मन्त्रालयले शनिबार आयोजित कोभिड १९ प्रेस ब्रिफिङमा सुनसरी, पर्सा, बारा, सिराह, मकवानपुर र भक्तपुरका संक्रमितको मृत्यु भएको औपचारिक रुपमा पुष्टि गरेको हो ।
मन्त्रालयका अनुसार मृत्यु हुनेमा सुनसरीका २ जना रहेका छन् । सुनसरीका ६ वर्षीया बालिका र ६७ वर्षीय पुरुषको मृत्यु भएको हो । पर्साका ६१ वर्षीय, ५८ वर्षीय र ४८ वर्षीय पुरुषको कोरोना संक्रमणले मृत्यु भएको छ । बाराका ५८ वर्षीय, सिरहाका ६८ वर्षीय, मकवानपुरका ५६ वर्षीय र भक्तपुरका ७३ वर्षीय व्यक्तिको मृत्यु भएको हो । यो सँगै नेपालमा कोरोना संक्रमणबाट मृत्यु हुनेको संख्या १४६ पुगेको छ ।