बुटवल । कांग्रेसको विरोधका कारण प्रदेशको स्थायी राजधानी दाङ लैजाने सरकारको निर्णयका विषयमा छलफलगर्न बसेको प्रदेश ५ सभाको बैठक स्थगित भएको छ ।
संसद सुरु हुने वित्तिकै विपक्षी दलका नेता वीरेन्द्रकुमार कनौडियाले
नेकपाका अध्यक्षद्वय केपी शर्मा ओली र पुष्पकमल दाहालले भन्दैमा मुख्यमन्त्रीले राजधानी सार्न खोजेको आरोप लगाउँदै राजधानी सार्नुपर्नाको कारण माग गरे ।
सहमतिमा राजधानी नतोकिएको भन्दै उनले बाहिर निषेधाज्ञा लगाएर तानाशाही शैलीमा राजधानी तोक्न खोजेको आरोप लगाए । उनी बोलेपछि कांग्रेस सांसदहरुले नाराबाजी गरेका थिए । सभामुखले केही समयका लागि बैठक स्थगित गरेका छन् ।
प्रदेशको अस्थायी राजधानी बुटवलबाट स्थायी राजधानी दाङको भालुवाङ लैजाने प्रदेश सरकारले निर्णय गरेर प्रदेशसभामा शुक्रबार नै पेश गरेको थियो ।
तर, बुटवललाई प्रदेशको स्थायी राजधानी नबनाएको भन्दै नेपाली कांग्रेसले आन्दोलन चर्काएपछि आज विहान भएको सर्वदलीय बैठकमा सहमति जुटेको थिएन । कांग्रेसले प्रदेश सभाको बैठक स्थगित गर्न माग गरेको थियो । तर, सत्तारुढ नेकपाको संसदीय दलले प्रदेशको स्थायी राजधानी दाङको भालुवाङ लैजाने सरकारको निर्णयका पक्षमा मतदान गर्न आफ्ना सांसदलाई ह्वीप लगाएको थियो ।
