ललितपुर । पाटन मंगलबजारमा रहेको कृष्ण मन्दिरमा यसवर्षको कृष्ण जन्माष्टमीको मेला नलाग्ने भएको छ । यसवर्षको कृष्ण जन्माष्टमी मंगलबार परेको छ ।
कोरोना संक्रमणको कारणले कृष्ण मन्दिर मंगलबार भक्तजनहरुका लागि बन्द गर्ने सोमबार निर्णय भएको हो ।
कोभिड–१९ महामारी व्यापक फैलिएका कारणले स्थानीय जनप्रतिनिधि, पुजारी, मंगल टोल सुधार संघ, प्रमुख जिल्ला अधिकारीलगायत सरोकारवालाको सोमबार बसेको बैठकले कृष्ण मन्दिर बन्द गर्ने निर्णय गरेको हो । प्रत्येक वर्ष भाद्र अष्टमीमा कृष्ण भगवानको जन्म भएको दिनलाई सम्झेर मुलुकभर कृष्ण मन्दिरमा मेला लाग्ने गर्दछ । पाटन दरबार क्षेत्रस्थित कृष्ण मन्दिरमा अष्टमीकै दिन राष्ट्रप्रमुखबाट पनि पूजा अर्चना गर्ने प्रचलनसमेत रहेको छ ।
कंशको अत्याचारबाट मानव जातिलाई मुक्ति दिनका लागि वासुदेव र देवकीको आठौं गर्भबाट भगवान विष्णुको आठौं अवतारका रुपमा कृष्णको जन्म भएको धार्मिक विश्वास छ ।
