ललितपुर । नेपाली सेनाको मेजर बताउने एक व्यक्ति पक्राउ परेका छन् । गएराति नेपाली सेनाको मेजर भन्दै धम्काउँदै हिँडिरहेको अवस्थामा सुरेश विष्टलाई महानगरीय प्रहरी वृत्त चापागाउँले पक्राउ गरेको हो ।
मादक पदार्थ सेवन गरेर गोदावरी नगरपालिका चापागाउँका मानिसलाई धम्काउँदै हिँडिरहेको अवस्थामा पक्राउ गरिएको महानगरीय प्रहरी वृत्त चापागाउँका प्रमुख डीएसपी कृष्णराज ओझाले बताए ।
उनका अनुसार पक्राउ परेका विष्टले २०६२ वैशाख ११ गते नेपाली सेनाको सेवा प्रवेश गरी २०६३ वैशाख ११ गते बर्खास्त भएका रहेछन् । सेनाका बर्दीसहित १ थान कपडा पनि बरामद गरिएको छ । ‘उनलाई हिरासतमा राखी अनुसन्धान गरिराखिएको छ ।,’ उनले भने, ‘सेनाको मेजर भनेर ठगी गरेको छ छैन त्यसको अनुसन्धान गरिन्छ । केही नगरेको भेटिए पनि उनलाई सेनाको पोशाक दुरुपयोग गरेको अभियोगमा मुद्दा चलाइन्छ ।’
‘सेनाको मेजर होला भनेर शुरुमा सैनिक प्रहरी बोलाएको थिएँ । तर सैनिक प्रहरीले व्यारेकमा फोन गर्दा विष्ट नक्कली मेजर रहेछ ।’ डीएसपी ओझाले भने ।
विष्टले आफू कंङ्गो जान जान लागेको भन्दै यसभन्दा अगाडिका डिएसपी र गोदावरी नगरपालिकाका मेयरसँग बसेरसँगै चिया खाएको प्रहरीले जनाएको छ ।
उनको घर गोदावरी नगरपालिका वडा नं. २, विष्टछाप हो । उनी जग्गासम्बन्धी कारोबार गर्ने स्रोतले बतायो ।
