ललितपुर । लकडाउनको ८३ दिनपछि सोमबारदेखि सरकारी तथा गैरसरकारी कार्यालयहरु खुलेका छन् । सरकारको निर्णयअनुसार दुई सिफ्टमा गरी सोमबारबाट ललितपुरका सरकारी कार्यालयहरु खुलेका हुन् । बिहान ८ बजेबाट दिउँसो १ बजेसम्म र १ बजेबाट साँझ ६ बजेसम्म गरी दुई सिफ्टमा कार्यालयहरु सञ्चालनमा आएका हुन् ।
सरकारी कार्यालयसँगै गैरसरकारी कार्यालय, बैंक तथा वित्तीय संस्थाहरु पनि सञ्चालनमा आएका छन् । लकडाउन खुकुलो बनेसँगै सडकमा सवारीको चाप पनि बढेको छ । सरकारले जोरबिजोर प्रणालीअनुसार सवारी सञ्चालन गर्ने निर्णय गरे पनि कार्यालयहरु सञ्चालन भएसँगै सवारीको चाप बढेको छ । कार्यालय प्रवेश गर्नु अगाडि सामाजिक दूरी कायम गर्दै तापक्रम लिने गरिएको छ । कतिपय कार्यालयमा हातमा सेनिटाइजर तथा हात धोएर कार्यालय भित्रसमेत सामाजिक दूरी कायम गर्नुपर्ने बताइएको छ । सेवाग्राहीहरुले समेत सेवा लिन जाँदा सामाजिक दूरी कायम गर्नुपर्ने छ ।
ललितपुर महानगरपालिकामा आज १५८ सेवाग्राही आएका छन् । महानगरीय प्रहरी परीसर ललितपुरका प्रवक्ता तुल बहादुर कार्कीका अनुसार १० जना सेवग्राही सेवा लिन प्रहरी कार्यालय आएको जानकारी दिए ।
जिल्ला प्रशासन कार्यालय ललितपुरका सहायक प्रमुख जिल्ला अधिकारी खिमराज भुसालका अनुसार सोमबार ६५ जनाले जिल्ला बाहिर जाने पास लिएका, ११ जनाले पासपोर्ट, ५ जनाको नयाँ नागरिकता, ६ जनाले प्रतिलिपि, ३ जना नावालक परिचय पत्र र मुद्धा शाखामा ६ जनाले सेवा लिएको बताए ।
मन्त्रिपरिषद्को जेठ २८ गते बसेको बैठकले सोमबारदेखि कार्यालयहरु दुई सिफ्टमा सञ्चालन गर्ने निर्णय गरेको थियो । लकडाउन खुकुलो भए पनि मानिसको भीडभाड हुने ठाउँ, शैक्षिक संस्था, अनुमतिप्राप्त बाहेक सम्पूर्ण उडानहरु, सभा सम्मेलनलगायतका क्षेत्र बन्द रहेका छन् । पैदल आवागमन भने खुला गरिएको छ ।
