ललितपुर । नेपाल कम्प्युनिष्ट पार्टी (नेकपा) ले ललितपुरको महालक्ष्मी नगरकमिटी गठनमा भागबण्डा मिलाएको छ । नगरकमिटी इन्चार्ज भरत कुमार पराजुलीका अनुसार पूर्व एमालेले ६० प्रतिशत र पूर्व माओवादी केन्द्रले ४० प्रतिशत पाउने गरी सहमती भएको छ ।
महालक्ष्मी नगरका इन्चार्ज पराजुली, सहइन्चार्ज केदार केसी, अध्यक्ष हरिगोविन्द श्रेष्ठ र सचिव श्यामकृष्ण महर्जनबीच मंगलबार भएको छलफलमा भागबण्डा गर्ने सहमती जुटेको हो । महलक्ष्मी नगरकमिटि ८१ सदस्यीय हुनेछ । यसआधारमा पूर्व एमालेले ४८ र पूर्व माओवादी केन्द्रबाट ३३ जना रहनेछन् ।
सहमतिलाई ललितपुर पार्टी कार्यालयमा बुझाइएको र जिल्ला कमिटिबाट अनुमोदन हुनेवित्तिकै नगरकमिटीको औपचारिक गठन गरिने इन्चार्ज पराजुलीले दैनिकीन्युजलाई बताए । नगरकमिटी गठन नभएकै कारण पार्टीको गतिविधि ठप्प भएको भन्दै जनस्तरबाट विरोध हुन थालेपछि गठनलाई तीव्रता दिएर सहमति गरेको उनले दाबी गरे ।
ललितपुर जिल्ला जिल्लामा ६ स्थानीय तह रहेको छ । तीन वटा स्थानीय तह बागमती, कोन्ज्योसोम र महांकालमा नेकपा गठन गरिसकेको छ । उता गोदावरी नगर र ललितपुर महानगर कमिटी अझै गठन हुन सकेको छैन । भागवण्डामा कुरा नमिल्दा गठन रोकिएको नेताहरु बताउँछन् ।
