ललितपुर । ललितपुरको महालक्ष्मी नगरपालिका वडा नंं ९ लामाटारमा रहेको काफ्ले सामुदायिक वन उपभोक्ता समूहले आर्थिक वर्ष २०७७–०७८ को उत्कृष्ट पुरस्कार प्राप्त गरेको छ । ललितपुर जिल्लाभित्रका सामुदायिक वनहरु मध्येबाट सामुदायिक वन संरक्षण र व्यवस्थापनमा उत्कृष्ट कार्य गरेकोले पुरस्कृत गरिएको डिभिजन वन कार्यालयका डिभिजन वन अधिकृत कृष्णराज न्यौपानेले बताए ।
समूहले सामुदायिक वनको मार्गदर्शनबमोजिम वन व्यवस्थापन र समूह परिचालन, निर्णय प्रक्रिया, सुशासन, सामाजिक विकास तथा पारदर्शितामा नतिजामूलक कार्य गरेकाले पुरस्कार प्रदान गरिएको कार्यालयको दाबी छ । पुरस्कारको राशि ४० हजार रुपैयाँ रहेको छ ।
कार्यक्रममा डिभिजन वन कार्यालय अधिकृत न्यौपानेले गत वर्षको आब २०७७–७८ मा सम्पन्न भएका कार्यक्रमको प्रगतिबारेमा जानकारी गराएका थिए ।
यसैगरी उक्त कार्यक्रममा चालू आव २०७८–७९ को डिभिजन वन कार्यालयको वार्षिक कार्यक्रम, राष्ट्रिय वन संरक्षण तथा व्यवस्थापन कार्यक्रम, पर्यापर्यटन तथा स्थानीय पर्यटन पूर्वाधधार विकास कार्यक्रम र वातावरण संरक्षण तथा शहरी वन विकास कार्यक्रमबारे जानकारी दिएका थिए ।
बैठकले उत्कृष्ट भएका काफ्ले सामुदायिक वन समूहलाई बधाई दिँदै आगामी दिनमा वन क्षेत्रको संरक्षण र विकासमा प्रभावकारीरुपमा काम गर्न अनुरोध समेत गरेको छ ।
वनका स्थानीय राजनीतिक दल, वन क्षेत्रका अगुवा र पत्रकाहरुले समेत सुझाव दिएका थिए ।
कार्यक्रमको सहजीकरण डिभिजन वन कार्यालयका सहायक वन अधिकृत थिर प्रसाद कोइरालाले गरेका थिए ।
