ललितपुर । जिल्ला प्रशासन कार्यालय ललितपुरले दशैलगायत चाडपर्व नजिकिएसँगै बजार अनुगमनलाई प्राथमिकता दिएको छ । कालोबजारी, मुल्य सूचि नराखेको, विक्रीका लागि राखिएको सामानको गुणस्तरीयता नभएको, उत्पादन मिति नभएको, पसल सञ्चालन गर्न अनुमति प्राप्त नभएको लगायतका कैफियत देखिएका १९ व्यवसायीलाई कारबाही गरेको छ ।

संयुक्त बजार अनुगमन टोलीले असोज ७ गतेदेखि १७ गतेसम्म जिल्लाका विभिन्न स्थानमा गरेको अनुगमनको क्रममा मापदण्ड विपरीत व्यवसाय सञ्चालन गर्ने व्यवसायीहरुलाई १ लाख ३५ हजार ५ सय रुपैयाँ जरिवाना तिराइएको ललितपुरका सहायक प्रमुख जिल्ला अधिकारी ललितकुमार बस्नेतले जानकारी दिए ।

अनुगमन टोलीले पुल्चोक स्थित सुमेरु सिटी हस्पिटललाई २० हजार जरिवाना तिराएको छ । सरकारले तोकिएको भन्दा एन्टिजेन परीक्षणमा बढी शुल्क लिएको पाइएपछि कारवाही गरिएको हो ।

त्यस्तै मानवभवन स्थित बिगमार्टलाई व्यवसाय दर्ता नगरेको, बजार अनुगमन समितिले दिएको निर्देशन पालना नगरेकोले २० हजार जरिवाना तिराइएको छ ।

सबै वस्तुको मूल्य सूचि, दर्ता प्रमाणपत्र देखिने गरी नराखेकोे पाइएका जेसवाल स्टोर सानेपा, गुलाब पाटन भाटभटेनी, एरोमा हिमालयन कफी लगनखेल, रोडहाउस पिजरियालाई १०÷१० हजार जरिवाना तिराइएको छ ।

यस्तै लगनखेलस्थित कफी बगानलाई ३ हजार, क्लिफ रेष्ट्रोलाई ५ हजार, डल्ले रेष्टुरेष्गट पुल्चोकलाई १० हजार, लेभल ३ टेरेसलाई ५ हजार, मःम हव पाट भाटभटेनीलाई २ हजार ५ सय, नेवारी किचेन, पाटन भाटभटेनीलाई ५ हजार, डोको फुड पाटन भाटभटेनीलाई २ हजार ५ सय रुपैयाँ जरिवाना तिराएको छ ।

कैफियत देखिएका हाउस अफ मःम एण्ड पाटन भाटभटेनी सुपरमार्केटलाई ५ हजार, आहारा हाउस प्रालि पाटन भाटभटेनीलाई २ हजार ५ सय, सर्किना टेड्रर्स गुसिङ्गाल, कृष्ण स्टोर गोदावरी–११ चापागाउँ, पिविएन गोदवारी–११ चापागाउँलाई ५÷५ हजार जिरिवाना तिराइएको छ ।

यस्तै जेएस लिक्वर्स सप, नखिपोटले विद्यालय परिसरमा मदिरा पसल सञ्चालन गरेको भन्दै पसल बन्द गरी आवश्यक कागजातसहित जिल्ला प्रशासन कार्यालयमा तीन दिनभित्र उपस्थित हुन निर्देशन दिएको छ । उक्त पसल जनप्रतिनिधिले संचालन गरेको खुलेको छ ।

अनुगमनको क्रममा विक्रीका लागि राखिएको सामानको गुणस्तरीयता, उत्पादन मिति भए÷नभएको, पसल सञ्चालन गर्न अनुमति प्राप्त भए÷नभएको, नगरपालिकामा दर्ता भए÷नभएको, लगायत विविध पक्षको जाँचबुझ गरिएको बस्नेतको भनाई छ ।

सहायक प्रजिअ बस्नेतको नेतृत्वमा रहेको अनुगमन टोलीमा घरेलु तथा साना उद्योग कार्यालय, उपभोक्ता मञ्च, उद्योग वाणिज्य संघ, महानगरीय प्रहरी परीसर, ललितपुर महानगरपालिका, नेपाल पत्रकार महासंघका प्रतिनिधि रहेको समिति रहेको छ ।