ललितपुर । ‘आफूलाई सर्जिकल सामग्री सप्लायर्स हुँ’ भन्दै ठगी गरेको आरोपमा युवकलाई प्रहरीले पक्राउ गरेको छ ।
महानगरीय अपराध महाशाखाले ललितपुर–४ बागडोलबाट ४२ वर्षीय सरल रानालाई पक्राउ गरेको प्रहरी उपरीक्षक कृष्णप्रसाद कोइरालाले जानकारी दिए ।
‘आफूलाई सर्जिकल सामग्री सप्लायर्स हुँ’ भन्दै उनले ४२ लाख २४ हजार रुपैयाँ ठगी गरेको आरोप छ ।
काठमाडौंको त्रिपुरेश्वरस्थित शंकर महर्जनले सञ्चालन गरेको किपु साईन्टिफिक ट्रेडर्समा मार्केटिङको काम गर्ने विश्वम्भरलाल श्रेष्ठ र बिक्रम देउवालाई उनले ठगी गरेको प्रहरी उपरीक्षक कोइरालाले बताए ।
पक्राउ परेका रानाले आफू भारत पञ्जाबस्थित माइरियाद ह्युस हेल्थ केयर कम्पनीको ‘नेपाल प्रतिनिधि हौं’ भनेका थिए ।
उनले पञ्जा, ल्याटेक्स एक्जामिनेसन पञ्जा विभिन्न साइजका एक सय प्रति बाकस प्रति ३ सय ३० भा.रु. पर्छ भनेका थिए । नमुना समेत देखाएर रानाले पटकपटक आइ एक हप्ताभित्र श्रेष्ठ र देउवाको विश्वास जितिसकेका थिए ।
पछि सामान माग गरी उनीहरूले ४२ लाख २४ हजार रुपैयाँ रानाको बैक खातामा जम्मा गरिदिएका थिए । तर पठाउँदा रानाले बाकसमा ५० पिसमात्रै राखेर गुणस्तरहीन सामान पठाएको आरोप छ ।त्यसपछि श्रेष्ठ र देउवाले रानालाई सम्पर्क गर्न खोज्दा बेपत्ता भए । ठगी गरेको आरोपमा महाशाखामा सरल राना, उमेश नकर्मी र सन्दिप थापा विरुद्ध जाहेरी पर्यो । जाहेरीपछि प्रहरीले उनीहरूलाई पक्राउ गरी थप अनुसन्धान अघि बढाएको हो । उनलाई पक्राउपछि आवश्यक कारवाहीको लागि महानगरीय प्रहरी परीसर टेकु काठमाडौंमा बुझाइएको कोइरालाको भनाइ छ ।
