ललितपुर । ललितपुरबाट प्रहरीले विभिन्न सामान चोरी गर्ने १० जनालाई पक्राउ गरेको छ । ल्यापटप, मोबाइल चोरीमा संलग्न ४ जना र सुन, नगद चोरी गर्ने ६ जनालाई पक्राउ गरेको हो ।
महानगरीय प्रहरी वृत्त सातदोबाटोबाट खटिएको टोलीले ललितपुर–१४ स्थित महालक्ष्मीस्थानबाट उनीहरुलाई पक्राउ गरेर अनुसन्धान गरिरहेको छ । सातदोबाटो प्रहरीले भदौ १२ मा महालक्ष्मीस्थानबाट २ जनालाई पक्राउ गरेको थियो । उनीहरुको बयानका आधारमा चोरीमा संलग्न थप २ जनालाई नियन्त्रणमा लिइएको वृत्त सातदोबाटोका प्रमुख, डीएसपी दिनेश घिमिरेले जानकारी दिए । आरोपीहरुको साथबाट प्रहरीले डेल कम्पनीको आई–५ ल्यापटप, सामसुङ, कलर्स, ओप्पो, आइफोन र एमआई कम्पनीका मोबाइल बरामद गरेको छ । चोरीमा संलग्न आरोपीहरुबाट बरामद गरिएको डेल कम्पनीको कालो रंगको ल्यापटप, एप्पलको म्याकबुक प्रो (सिल्भर रंग) र ‘इ’ लेखिएको ल्यापटपका धनी प्रहरीको सम्पर्कमा आएका छैनन् । ल्यापटप धनीसँग सम्पर्क गर्ने लगायत चोरीमा संलग्नहरूमाथि थप अनुसन्धान भइरहेको डिएसपी घिमिरेले बताए । आफ्नो ल्यापटप हराएको भएमा सातदोबाटोस्थित प्रहरी वृत्तमा सम्पर्क गर्न पनि डिएसपी घिमिरेले आग्रह गरेका छन् ।
त्यस्तै सुन र नगद चोरी गर्ने कार्यमा संलग्न ६ जना पक्राउ गरेको छ । गत भदौ २ गते ललितपुर–१३ कुसुन्ती स्थित शान्ता लामिछानेको घरमा १५ मिनेटको अन्तरालमा सुत्ने कोठामा ताल्चा लगाई भान्सा कोठामा खान गएको मौका छोपी घरको ताला फोडी कोठामा रहेको दराज फोडेका थिए । दराजभित्र झोलामा राखिएको करिब १० तोला सुनको गरगहनाहरु र १० लाख रुपैयाँसमेत चोरी गरेका थिए । वृत सातदोबाटोवाट खटिएको प्रहरी टोलीले सुक्ष्म अनुसन्धान पश्यात २ जना भई चोरी गरेको र चोरीको गरगहना बिभिन्न स्तरमा किनबेच समेत गरी सुनको स्वरुप परिवर्तन गर्ने कार्यमा संलग्न बिना बिल सुन किन्ने र बेच्ने कार्यमा सलग्न अन्य ४ जनालाई ललितपुरको विभिन्न एरियाबाट पक्राउ गरेको डीएसपी घिमिरेले बताए । गननाको स्वरुप परिबर्तन भैसकेको अबस्थामा करिब ३ तोला सुन, धनमालसँगै चोरी भएको मोबाईल र रु ४५ हजार नगद सहित भएको घिमिरेको भनाई छ । उनीहरु विरुद्ध चोरी सम्बन्धी कसुर मुद्धामा अनुसन्धान कार्य भईरहेको र अन्य फरार ब्यक्तिहरुको समेत खोजतलास भईरहेको महानगरीय प्रहरी वृत्त सातदोबाटोले जनाएको छ ।
