काठमाडौं । कोरोनाको कारण निर्धारण गरिएको कुनै परीक्षा नरोकिने भएको छ । त्रिभुवन विश्वविद्यालय परीक्षा नियन्त्रण कार्यालयले पूर्वनिर्धारित तालिकाअनुसार परीक्षा सुरु हुने जनाएको हो । पुरानो कोर्सको स्नातक तह तीन वर्षे र चार वर्षे तथा स्नातकोत्तर तहको परीक्षा सुचारु छ । कोभिड–१९ महामारीको कारण लामो समयदेखि रोकिएका परीक्षा लिनैपर्ने बाध्यता रहेको नियन्त्रक पुष्पराज जोशीले बताए । ‘१९ महिनादेखि रोकिएको परीक्षा सुचारु राखेका हौं,’ परीक्षा नियन्त्रक जोशीले भने, ‘निर्धारित तालिकाअनुसार सबै परीक्षा सुचारु रहन्छ ।’ स्नातकमा ३० हजार र स्नातकोत्तर तहका ४२ हजार परीक्षार्थी रहेका छन् । जसमा व्यवस्थापन संकायको एक विषय, विज्ञान र शिक्षाशास्त्रका दुई–दुई विषय बाँकी रहेका छन् । उक्त परीक्षा यही साउन २४ गते सकिने छ । त्यसैगरी मानविकीतर्फ स्नातक ३ र ४ वर्षे कोर्सको परीक्षा साउन २९ गते सकिने नियन्त्रक जोशीले जनाएका छन् । वार्षिक प्रणालीअन्तर्गतका एलएलबी पहिलो र दोस्रो वर्षको परीक्षा भदौ ११ र २७ गतेबाट हुने तालिका छ । स्नातकोत्तर तह दोस्रो वर्षको परीक्षा आगामी असोजभित्र परीक्षा लिइने समेत जनाइएको छ ।