काठमाडौँ । गैरकानुनी रुपमा पत्रकारलाई पक्राउ गरिएको भन्दै सर्वोच्च अदालतमा निवेदन दर्ता भएको छ । उज्यालो नेटवर्क डटकमका पत्रकारद्वय श्याम बहादुर तामाङ (अनिस) र दुर्गालाल लामा (प्रभात) लाई प्रहरीले गैरकानुनी रुपमा पक्राउ गरेको भन्दै सर्वोच्च अदालतमा बन्दी प्रत्यक्षीकरणको निवेदन दर्ता भएको हो ।
प्रधानमन्त्री केपी शर्मा ओली र भारतीय गुप्तचर निकाय (रअ) का प्रमुख सामन्त गोयलबीच भएको भनिएको विवादास्पद सम्झौताको प्रति भन्दै त्यससँग सम्बन्धित समाचार उज्यालो नेटवर्क डटकमले प्रकाशित गरेको थियो । फर्जी भनिएको उक्त सम्झौतापत्र प्रकाशित भएलगत्तै उज्यालो नेटवर्कले माफी मागेको थियो ।
त्यसपछि प्रहरीले आफूलाई धरपकड गर्न खोजेको भन्दै उज्यालो नेटवर्कका सञ्चालकहरु उच्च अदालत पाटन पुगेका थिए । उच्च अदालतले तत्कालका लागि उनीहरुलाई पक्राउ नगर्नु भनेर अन्तरिम आदेश दिएको अवस्थामा प्रहरीले पक्राउ गरेको हो । मंगलबार बन्दी प्रत्यक्षीकरणको निवेदनमाथि प्रारम्भिक सुनुवाइ हुनेछ ।
