काठमाडौं । नेकपा (एमाले)को माधवकुमार नेपाल पक्षले अध्यक्ष तथा प्रधानमन्त्री केपी शर्मा ओलीका अवैधानिक, अलोकतान्त्रिक र स्वेच्छाचारी गतिविधि पराजित गरिछाड्ने बताएको छ ।
आइतबार एक विज्ञप्ति जारी गर्दै नेपाल पक्षले ओलीमा अहंकार र संकीर्णतामा रमाउने प्रवृति रहेको पनि आरोप लगाएको छ । गत शुक्रबार ओली पक्षको केन्द्रीय कमिटी बैठकले माधवकुमार नेपाल पक्षका पदाधिकारीको पद खारेजी र जिम्मेवारी खोसेको थियो । त्यसपछि नेपाल पक्ष असन्तुष्टि राख्दै फरक गतिविधि गर्दै आएको छ । सो समूहले छुट्टै राष्ट्रिय कार्यकर्ता भेला बोलाएको छ भने निर्वाचन आयोगमा ओली समूहले गरेका निर्णयलाई वैधानिकता नदिन पत्र पठाएको छ ।
आयोगलाई पत्र लेखेपछि नेपाल पक्षका नेताहरूले संयुक्त विज्ञप्ति जारी गरेका छन् । 'सम्पूर्ण पार्टी सदस्य र समर्थकहरूले केपी ओलीको राज्यसत्ता संरक्षित दक्षिणपन्थ र विसर्जनवादका विरुद्ध दृढताका साथ संघर्ष गर्दै अघि बढ्नु अपरिहार्य भएको छ । नेपाल कम्युनिष्ट पार्टी (एकीकृत मार्क्सवादी, लेनिनवादी)को सिद्धान्त, नीति र विधि हाम्रो पक्षमा छ र हामी केपी ओली गुटका अवैधानिक, अलोकतान्त्रिक र स्वेच्छाचारी कृत्यहरूलाई पराजित गरी छाड्नेछौं,' विज्ञप्तिमा उल्लेख छ । वक्तव्यमा मुलुकको अग्रगामी परिवर्तनलाई सुदृढ र वामपन्थी शक्तिहरूलाई एकताबद्ध बनाउँदै अगाडि बढ्नुपर्ने लेखिएको छ । ओलीमा कम्युनिष्ट पार्टीको सदस्यका सामान्य राजनीतिक आचरण नैतिकता नरहेको तथा अहंकार, संकीर्णस्वार्थमा रमाउने प्रवृत्तिले रहेको नेपाल पक्षको भनाइ छ ।
ओली विधानअनुरुप सञ्चालन गर्नबाट ओली चुकेको र गुटगत गतिविधि अगाडि बढाएको नेपाल पक्षको भनाइ छ । 'विधान अनुरूप पार्टी सञ्चालन हुनुपर्ने कुरामा जोड दिँदा केपी ओली गुटलाई पाच्य भएन । कार्यकर्ता र जनताका सामू लोकतन्त्र र विधिका नक्कली कुरा गर्दै व्यवहारमा निरंकुश र तानाशाही व्यवहार गर्ने, गुटबन्दी गर्ने, दक्षिणपन्यी अवसरवादलाई अंगाली वामपन्धी आन्दोलन र पार्टीलाई विसर्जनको दिशातिर लैजाने काम केपी गुटबाट भयो,' अगाडि भनिएको छ, 'अन्तत, सात दशक लामो संघर्षबाट नेपाली कम्यनिष्ट आन्दोलनले प्राप्त गरेका उपलब्धीमाथि घात गर्दै जनता, देश र पार्टीमाथि नै विश्वासघात गरिएको छ। उपर्युक्त वस्तु तथ्यले केपी ओलीबाट कम्युनिष्ट पार्टीलाई एकीकृत हुननदिने, वामपन्धीहरूको नेतृत्वमा देश र जनताप्रति समर्पित सरकार सञ्चालन गर्न नदिने तथा विधि र पद्धतिको रक्षा गर्ननदिने कार्य नै भइरहने देखिन्छ ।'
