कास्की । काठमाडौंमा निषेधाज्ञाको समय बढाइरहेका बेला प्रमुख पर्यटकीय शहर पोखरा समेत रहेको कास्की जिल्लाले भने शनिबारदेखि निजी यातायात चलाउने दिने निर्णय गरेको छ ।
जिल्ला प्रशासन कार्यालय कास्कीले शुक्रबार राति १२ बजेदेखि भदौ २० गते राति १२ बजेसम्म निजी सवारी साधन तथा टयाक्सी जोर–बिजोर प्रणालीमा चलाउन दिने निर्णय गरेको हो । यसअघि भदौ २ गते रातिदेखि भदौ १२ गते रातिसम्म कास्कीमा निषेधाज्ञा जारी गरिएको थियो ।
नयाँ निर्णयले शनिबारदेखि एकहप्तासम्म बिहान ६ बजेदेखि साँझ ९ बजेसम्म जोर–बिजोर प्रणालीमा निजी सवारी साधन र टयाक्सी सञ्चालन गर्न पाइनेछ ।
यात्रुबाहक यातायात चलाउन भने अझै दिइएको छैन । सो अवधिमा होटल तथा रेस्टुरेन्टले साँझ ७ बजेसम्म ‘टेक–अवे’ सेवा दिन सक्ने प्रमुख जिल्ला अधिकारी ज्ञानप्रसाद ढकालले बताए ।
कास्कीमा सरकारी कार्यालय, बैंक तथा वित्तीय संस्था, निर्माण तथा उद्योग भने यसअघि नै स्वास्थ्य सुरक्षा मापदण्ड सञ्चालन गर्न दिइएको छ ।
