काठमाडौं । बलिङमा कुशल भुर्तेल चम्किएको खेलमा आईसीसी वल्ड कप लिग टूमा नेदरल्याण्ड्स १ सय ३७ रनमा अलआउट भएको छ ।
कीर्तिपुर मैदानमा नेपालले टस जितेर फिल्डिङ रोजेपछि ब्याटिङमा आएको नेदरल्याण्ड्स ३९ ओभरमा १ सय ३७ रनमा आलआउट भएको हो ।
नेदरल्याण्ड्सलाई सस्तैमा समेट्न नेपालका लागि कुशल भुर्तेलले सर्वाधिक ४ विकेट लिए ।
त्यस्तै ललित राजवंशीले ले १० ओभरमा ३२ रन खर्चिएर २ विकेट लिए । सोमपाल कामीले नेपाललाई खेलमा पहिलो विकेट दिलाउँदा कप्तान रोहित पौडेलले समेत एक विकेट लिए ।
नेदरल्याण्ड्सको इनिङ्समा कप्तान स्कट एडवर्डसले सर्वाधिक ३३ रन बनाए । उनलाई भुर्तेलले बोल्ड गरेका थिए । बास डी लिडे २७ र साइब्रान्ड एनगेलब्रेक्टले २३ रनको योगदान दिए । अन्य ब्याटरको प्रर्दशन उल्लेख्य रहन सकेन ।
दुवै टिम सन् २०२७ को विश्वकप छनोटको रुपमा रहेको लिग टूको प्रतिस्पर्धामा उत्रिएका हुन् । नेपालले पहिलो खेल नामिबियासँग गुमाएको थियो । नेपाल लिग टूमा पहिलो जित दर्ता गर्ने लक्ष्यमा छ ।
