ललितपुर । ललितपुरको महालक्ष्मी नगरपालिका कोरोना भाइरस (कोभिड–१९) को हटस्पटको रुपमा देखा परेको छ । दिनदिनै महालक्ष्मी नगरपालिको विभिन्न वडा कोरोना संक्रमित बढीरहेको छ । कोरोना बढेसँगै स्थानीयमा त्रास छाएको छ ।
मंगलबारसम्म ८ जना कोरोना संक्रमित भेटिएकोमा बुधबार २ जना कोरोना संक्रमित देखा परेको थियो । तर आज बिहीबार कोरोना संक्रमितको संख्या ह्वात्तै बढेको छ ।
स्वास्थ्य कार्यालय ललितपुरका प्रमुख डा. खगेश्वर गेलालका अनुसार आज नगरपालिकाको लुभु, टीकाथली, इमाडोल, सिद्धिपुर लगायतका स्थानमा १२ जना कोरोना संक्रमित भेटिएको छ ।
योसँगै महालक्ष्म नगरपालिकामा कोरोना संक्रमितको संख्या २२ पुगेका छन् । २२ मध्ये टीकाथलीका ५० वर्षिय पुरुषको निधन भएको छ ।
आज ललितपुरमा १४ जना कोरोना संक्रमित भेटिएका छन् । ललितपुर महानगरपालिकामा २ जना र महलक्ष्मी नगरपालिकामा १२ जना भेटिएका छन् ।
महालक्ष्मी नगरपालिकामा कोरोना संक्रमित बढेपछि बुधबार नगरपालिकाले एकसूचना प्रकाशित गर्दै वडा नं. ७, ८ र ९ सञ्चालित अत्यावश्यक सेवाका बाहेक अन्य व्यवसाय बन्द गर्ने निर्णय गरेको छ ।
