बारा । छिमेकी २६ वर्षीय राजेश माझीलाई धारिलो हतियार खुर्पा प्रहरी गरी घाइते बनाएको अभियोगमा २ जनालाई शनिबार राति प्रहरीले पक्राउ गरेको छ ।
पक्राउ पर्नेहरुमा जितपुर सिमरा उपमहानगरपालिका वडा नं. ३ बजनी बस्ने २१ वर्षीय सुरज लामा र उनकै मामा २९ वर्षीय पासाङ लामा रहेका छन् ।
सुरजसँगको सामान्य बादबिबादमा धारिलो हतियार प्रहार गर्दा माझी घाइते भएको भन्ने खबर प्राप्त हुनासाथ ईलाका प्रहरी कार्यालय सिमराबाट खटिएको प्रहरीले घटनामा संलग्न उनीहरुलाई पक्राउ गरेको हो ।
घाइते माझीको अल्पाइन अस्पताल सिमरामा उपचार भइरहेको छ । यस सम्बन्धमा प्रहरीले थप अनुसन्धान गरिरहेको जिल्ला प्रहरी कार्यालय बाराका प्रवक्ता डीएसपी गौतम मिश्रले जानकारी दिए ।
