काठमाडौं । बुधबार सेयर कारोबार मापक नेप्से परिसूचक झिनो अंकले बढेको छ । नेप्से परिसूचक समग्रमा बढे पनि अधिकांश समूह घटेका छन् ।
परिसूचक ७.०४ अंकले बढेर २ हजार ६८ दशमलव ४५ अंकमा पुगेर आजको कारोबार बन्द भएको छ । उता ‘क’ वर्गका कम्पनीहरूको सेयर कारोबार मापन गर्ने सेन्सेटिभ इन्डेक्स भने १.२४ अंकले ओरालो लागेको छ ।
आज २०३ कम्पनीका १ करोड १५ लाख ५८ हजार ९ सय ९१ कित्ता सेयर किनबेच भई ६ अर्ब ८६ करोड २४ लाख ४५ हजार २ सय १५ रुपैयाँ बराबरको कारोबार भएको नेपाल स्टक एक्सचेञ्जले जनाएको छ ।
समग्रमा नेप्से परिसूचक बढे पनि व्यापार, होटल, विकास बैंक, हाइड्रोपावर, फाइनान्स लगायतका अधिकांश सब–इन्डेक्सहरु घटेरका छन् । बुधबार बैङ्किङ क्षेत्रको कारोबार २४.२७ अंक, जीवन बिमा ३९४.०७ र म्युचुअल फण्ड ०.०७ अंकले बढेका छन् ।
बुधबार धेरै कमाउनेमा नविल बैंकका लगानीकर्ता पहिलो नम्बरमा देखिएका छन् । यस कम्पनीको शेयर मूल्य ९.९७ प्रतिशतले बढेर पोजिटिभ सर्किट लागेको छ । नविल बैंकले गत आर्थिक वर्ष २०७६–०७७को मुनाफाबाट ५१ प्रतिशत लाभांश दिने प्रस्ताव गरेको छ । नविलको लाभांशका कारण पनि लगानीकर्ताहरू यता आकर्षित देखिएका छन् ।
