काठमाडौं । दशैंको विदापछि खुलेको शेयर बजारमा बुधबार नेपाल स्टक एक्स्चेञ्ज (नेप्से) ४१.२० अंकको वृद्धिसँगै बजार एक हजार ४७ दशमलब ४६ पुगेको छ । र्२ अर्ब ७२ करोड ५९ लाख ९४ हजार ६९ रुपैयाँ बराबरको शेयर कारोबार भएको छ ।
बुधबार ‘क’ वर्गको कारोबार मापन गर्ने सेन्सेटिभ इन्डेक्स पनि ९.२१ अंकले बढेर ३२७.७६ अंकमा पुगेको छ । जुन पछिल्लो कारोबारको तुलनामा २.८९ प्रतिशत बढी हो । अधिकांश बाणिज्य बैंकहरुको शेयर मूल्यमा वृद्धि भएको छ ।
आज ग्लोबल आईएमई बैंकको सेयर कारोबार उच्च भएको छ । बैंकको एकैदिन २० करोड ६५ लाख रुपैयाँ बराबरको सेयर किनबेच भएको छ । त्यस्तै, प्राइम कमर्शियल बैंकको १७ करोड ४४ लाख रुपैयाँ, प्रभु बैंकको १६ करोड २७ लाख रुपैयाँ, सिटिजन्स बैंकको १० करोड ७० लाख रुपैयाँ, नेपाल बैंकको ९ करोड रुपैयाँ बराबरको सेयर किनबेच भएको छ । त्यस्तै, कुमारी बैंक, एनआईसी एशिया बैंक, एनएमबी बैंक, सिभिल बैंक र मेगा बैंकको पनि साढे ६ करोड माथिको सेयर कारोबार भएको छ ।
कारोबारको सुरु देखि नै बैंकमा लगानीकर्ताको ध्यान गएको छ । जसले गर्दा बैकिङ समूहको उपसूचक ५५.१५ अंकले बढेको छ । यस्तै होटल ३२.८५, विकास बैंक ६०.९७, वित्त कम्पनी १३.३८, निर्जीबन बीमा ४७.०७, जीवन बीमा ११०.६८, माइक्रोफाइनान्स समूहको उपसूचक २५.१९ अंकले बढेको छ ।
अर्थमन्त्रीमा विष्णु पौडेल नियुक्ति भएका र उनले अर्थतन्त्रका बारेमा नीतिगत रुपमा केही परिवर्तन आउन सक्ने भएकाले पनि बजार बढेको विश्लेषकहरुको भनाइ छ । बजार अझै बढने अपेक्षा ठूला लगानीकर्ताको छ ।
केही वाणिज्य बैंकहरुले गत आर्थिक वर्षको कमाईबाट लगानीकर्तालाई बितरण गरिने लाभांस प्रस्ताव गरिसकेका छन् भने धेरैले गर्न बाँकी छ ।
कोरोना कहरका बीच वाणिज्य तथा विकास बैंकहरुले एकपछि अर्को गर्दै सरप्राइज लाभांश घोषणा गर्न थालेपछि त्यसको प्रभाव सेयर बजारमा देखिएको छ । यही कारण दशैंविदा पछि खुलेको सेयर बजारमा उछाल आएको छ । मुख्य रुपमा बैंकिंग समूहकै कारण नेप्से परिसूचकमा उछाल आएको हो ।
