काठमाडौं । आज एनआईसी एशिया लघुवित्तले निष्काशन गरेको आईपीओ बाँडफाँड भएको छ । लघुवित्तको आईपिओ बिक्री प्रबन्धक सानिमा क्यापिटलको कार्यालयमा बाँडफाँड भएको हो ।
१६ हजार ४९७ जना आवेदकको आवेदन रद्द भएको क्यापिटलले जनाएको छ । बाँकी रहेका ३ लाख ९७ हजार ७ सय ४१ योग्य आवेदकलाई शेयर बाँडफांड गरिएको हो ।
लघुवित्त क्षेत्रकै सबैभन्दा ठूलो आकारको आइपीओमा रितपूर्वक आवेदन दिने सबैले १० कित्ताको दरले सेयर हात पारेका छन् । थप ४६ हजार ५७९ जना लगानीकर्ताले गोलाप्रथाको माध्यमबाट थप १० कित्ताको दरले सेयर पाएका छन् ।
यस कम्पनीले असार १० गतेबाट ४७ करोड ५५ लाख बराबरको ४७ लाख ५५ हजार कित्ता आइपीओ निष्कासन खुला गरेको हो । जसमा कुल निष्कासनमध्ये ०.५ प्रतिशत अर्थात ७४ हजार कित्ता सेयर कर्मचारीका लागि सुरक्षित गरिएको छ भने ५ प्रतिशत अर्थात २ लाख ३७ हजार ८०० कित्ता सेयर सामूहिक लगानी कोषको लागि बाँडफाँड गरिएको छ । बाँकी ४४ लाख ४३ हजार २०० कित्ता सेयर सर्वसाधारणका लागि बिक्री खुला गरिएको हो । जसमा ५.१९ गुणा बढी आवेदन अर्थात २ करोड ३० लाख ३९० कित्ताका लागि आवेदन परेको थियो ।
