काठमाडौं । लगातार दोस्रो दिन नेपाली बजारमा सुनको भाउ घटेको छ। आइतबार तोलामा २ हजार ९ सय रुपैयाँले घटेको सुनको भाउ सोमबार पनि ४ सय रुपैयाँले घटेको हो।
नेपाल सुनचाँदी व्यवसायी महासंघका अनुसार सोमबार छापावाल सुनको भाउ प्रतितोला २ लाख ९१ हजार ५ सय रुपैयाँ कायम भएको छ। आइतबार सुन प्रतितोला २ लाख ९१ हजार ९ सय रुपैयाँमा कारोबार भएको थियो।
यसअघि शुक्रबार भने सुनको भाउ प्रतितोला १ हजार ५ सय रुपैयाँ बढेर २ लाख ९४ हजार ८ सय रुपैयाँ पुगेको थियो।
गत साताको सोमबार र मंगलबार मात्रै सुनको भाउ प्रतितोला ८ हजार ८ सय रुपैयाँले घटेको थियो। त्यसपछि केही दिन बढेको सुनको भाउ फेरि निरन्तर घट्न थालेको हो।
यता चाँदीको भाउमा पनि गिरावट आएको छ। सोमबार चाँदी प्रतितोला ६० रुपैयाँले घटेर ४ हजार ३ सय ३० रुपैयाँमा झरेको महासंघले जनाएको छ।
नेपाली बजारमा सुनको भाउले गत माघ १५ गते हालसम्मकै उच्च रेकर्ड कायम गरेको थियो। त्यस दिन प्रतितोला २० हजार ५ सय रुपैयाँले बढ्दै सुनको भाउ ३ लाख ३९ हजार ३ सय रुपैयाँ पुगेको थियो।
त्यस्तै, चाँदीको भाउ पनि गत माघ १५ गते प्रतितोला ७ हजार ५ सय ५ रुपैयाँसम्म पुगेको थियो। यो नेपाली बजारमा चाँदीको हालसम्मकै उच्च भाउ हो।
माघ १८ गते चाँदीको मूल्य प्रतितोला १ हजार ५ सय ६५ रुपैयाँले घटेको थियो। यो पनि चाँदीको मूल्यमा एकै दिन आएको हालसम्मकै ठूलो गिरावट हो।
