काठमाडौं । आज नेप्से परिसूचक १७ दशमलव ९९ अङ्कले बढेर दुई हजार ६३४ दशमलव ५७ विन्दुमा पुगेको छ ।
आज होटल र अन्य समूहबाहेक अरू सबै समूहको शेयर बढ्दा विकास बैंक, बीमा, फाइनान्स र जलविद्युत् समूहको शेयर उच्च अङ्कले बढेको छ ।
आज २३१ कम्पनीको ५१ लाख ८९ हजारभन्दा बढी कित्ता सेयर खरिदबिक्री भएका छन् । आज दुई अब ५९ करोड २७ लाखको कारोबार भएको छ ।
२० करोड ९४ लाख रुपैयाँभन्दा बढीको कारोबारसहित आज नेपाल टेलिकम अग्रस्थानमा रहेको छ । यसैगरी, दोस्रो र तेस्रो स्थानमा क्रमशः अरुण भ्याली हाइड्रोपावर र जीवन विकास लघुवित्त परेका छन् ।
आज सबैभन्दा धेरै इमर्जिङ नेपाल कम्पनीको शेयर १० प्रतिशतले बढेको छ । समग्र बजार बढे पनि एनटीसीको शेयर झन्डै तीन प्रतिशतले घटेको छ ।
चार कम्पनीको बोनस शेयर सूचिकृत
नेप्सेमा चार कम्पनीको बोनस शेयर सूचीकृत भएको छ ।
नेपाल एसबिआई बैंक लिमिटेको ३ दशमलव ५० प्रतिशत, वोमी लघुवित्तको २० प्रतिशत, प्राइम लाईफ इन्स्योरेन्सको १५ प्रतिशत र पोखरा फाइनान्सको ८ दशमलव शून्य ७५ प्रतिशत बोनस शेयर नेप्सेमा सूचीकृत भएको हो ।
नेपाल एसबिआई बैंकले उक्त बोनस शेयर बापतको ३३ लाख २२ हजार ७५२ दशमलव २६०३ कित्ता, वोमी लघुवित्तको ८ लाख २३ हजार ८८८ दशमलव ८० कित्ता, प्राइम लाईफको ३६ लाख २५ हजार ५८५ दशमलव ५४ कित्ता र पोखरा फाइनान्सको ७ लाख ७७ हजार ७४० दशमलव २३ कित्ता शेयर नेप्सेमा थपिएको हो ।
मंगलवारदेखि कारोबारयोग्य हुने यी शेयर सम्बन्धित शेयरधनीहरुले भने आफ्नो हितग्राही खातामा जम्मा भएपछि मात्र कारोबार गर्न सकनेछन् ।
