काठमाडौं । तीन दिन लगातार घटेको शेयर कारोबार मापक नेप्से परिसूचक बुधबार भने सुधार भएको छ । बुधबार नेप्से परिसूचक ५० दशमलव ५८ अंक बढेर २ हजार ६ सय ६५ दशमलव ९३ बिन्दुमा पुगेर कारोबार बन्द भएको छ । यस्तै यस दिन ‘क’ वर्गका कम्पनीहरुको मापन सेन्सेटिभ परिसुचक ८.५८ अंकले बढेर ५ सय ३ दशमलव ४६ अंकमा पुगेर बन्द भएको छ । आज नेप्सेमा सूचिकृत २२९ कम्पनीको ९९ लाख ९४ हजार ४७८ कित्ता शेयर किनबेच हुुँदा ५ अर्ब २ करोड ८५ लाख ५५ हजार ९२ रुपैयाँ बराबरको कारोबार भएको छ । यस दिन ६३ हजार ९१६ वटा कारोबार भएको छ । यस अघि तीन दिन लगातार घट्दा नेप्से परिसूचक २ सय अंकले तल झरेको थियो ।
आज सर्वाधिक कारोबार गर्ने कम्पनीमा अपी पावर रहेको छ । कम्पनीको आज एकै दिन २२ करोड ६७ लाख ५४ हजार ३७२ रुपैयाको कारोबार भएको हो । त्यस्तै, हिमालयन डिस्टीलरीको १८ करोड ५९ लाख, नेपाल बैंकको १६ अर्ब ५२ लाख, यूनाइटेड मोदी हाईड्रोपावरको १६ करोड ५ लाख र आइसीएफसी फाइनान्सको १५ करोड ३४ लाख बराबरको कारोबार भएको छ ।
बजारमा उच्च अंकको सुधार आउँदा अधिकांश कम्पनीहरुको शेयर मूल्य बढेको छ । समूहगत सूचकहरु सबै बढेका छन् । धेरै बढ्नेको शिर्ष स्थानमा ग्रीन डेभलपमेन्ट बैंक देखिएको छ । यो बैंकको शेयर मूल्य १० प्रतिशतले बढेको छ । धेरै बढ्ने दोस्रो नम्बरमा अपी हाइड्रोपावर देखिएको छ । यो कम्पनीको शेयर मूल्य पनि १० प्रतिशतले बढेको छ । बुधबार कालिका माइक्रोफाइनान्स, जोशी हाइड्रोपावर, मनकामना स्मार्ट लघुवित्त लगायतका कम्पनीहरु धेरै बढ्नेको शिर्ष स्थानमा देखिएका छन् ।
बुधबार उच्च अंकले बजार सुधार हुँदा पनि केही कम्पनीहरुको शेयर मूल्यमा गिरावट आएको छ । जसमध्ये सबैभन्दा शीर्ष स्थानमा मेगा बैंक देखिएको छ । मेगा बैंकको शेयर मूल्य ३. ९२ प्रतिशतले घटेको छ । जम्मा ६ प्रतिशतमात्रै लाभांश घोषणा गरेको कुमारी बैंकको पनि शेयर मूल्य घटेको छ । कुमारी बैंकको १.६५ प्रतिशतले घटेको छ ।
