काठमाडौं । साताको अन्तिम कारोबार दिन बिहीबार सेयर बजारमा नयाँ रेकर्ड कायम भएको छ । सेयर कारोबार मापक नेपाल स्टक एक्सचेन्ज (नेप्से) परिसूचक उच्च अंकले बढेर बजारमा नयाँ रेकर्ड कायम भएको हो ।
आज नेप्से सूचक २९.५५ अंकले बढेर २८ सय ५६.७७ अंकमा पुगेको छ । गत आइतबार नेप्से परिसूचक २८ सय २७.९३ अंकमा पुगेर नयाँ रेकर्ड कायम भएको थियो ।
नेप्से परिसूचकसँगै कारोबार रकममा समेत उल्लास देखिएको छ ।
बिहीबार कूल २१८ वटा कम्पनीकाे ३ कराेड ४६ लाख ९१ हजार ३ सय १२ कित्ता सेयर खरिदबिक्री हुँदा १६ अर्ब ९० करोड ७० लाख २० हजार २ सय ८६ रूपैयाँ बराबरको कारोबार भएकाे नेप्सेले जनाएकाे छ ।
स्टकका अनुसार कारोबार भएका कूल १३ उपसमूहमध्ये ९ वटा उपसमूहकाे सेयर बढेकाे छ भने बाँकी ४ वटा उपसमूहकाे सेयर घटेकाे छ । बिहीबार विशेषगरी वाणिज्य बैंक समूहको शेयरमूल्यमा वृद्धि भएको छ । विकास बैंक, फाइनान्स समूह पनि बढेका छन् र यी ३ वटै समूहमा वृद्धि आउँदा नेप्से सूचकमा पनि दोहोरो अंकको वृद्धि भएको छ ।
यता, कारोबारको आधारमा आज सबैभन्दा बढी कारोबार नेपाल रि–इन्स्योरेन्स कम्पनी भएको छ । यस कम्पनीको आज एक अर्ब २ करोड ७० लाख २७ हजार २८७ रुपैयाँको शेयर कारोबार भएको छ ।
आज ४ कम्पनीको शेयरमूल्यमा उच्च बृद्धि भएको छ । आज शेयरमूल्यमा उच्च बृद्धि हुने कम्पनीहरुमा मञ्जुश्री फाइनान्स कम्पनी, महिला लघुवित्त वित्तिय संस्था, गुराँस फाइनान्स र ग्रिन डेभलपमेन्ट बैंक रहेका छन् ।
त्यस्तै, आज पञ्चकन्यामाई हाइड्रोपावर र राधी विद्युत कम्पनीका लगानीकर्ताले सर्वाधिक गुमाएका छन् । पञ्चकन्यामाईको शेयरमूल्य आज ५.९२ प्रतिशत, राधीको शेयरमूल्य ५.०६ प्रतिशतले घटेको छ।
