काठमाडौं । निरन्तर ओझेलमा परेको बैंकिङ समूहमा चमक देखिँदा सेयर बजारमा थप हरियाली छाएको छ । आज नेप्से सूचकलाई बैंकिङ, जीवन बिमा र विकास बैंक समूहले साथ दिएका छन् ।
आज नेप्से ३७.४८ अंकले बढेर २ हजार पाँच सय ६१ दशमलब ४७ विन्दुमा पुगेको छ । यस दिन सेन्सेटिभ इण्डेक्स ७.२८ अंक र फ्लोट इण्डेक्स ३.३६ अंक र सेन्सेटिभ इण्डेक्स ३.३१ अंक बढेको छ । आज कारोबार शुरु भएको केहि बेरमै नेप्से दुई हजार पाँच सय ६३ दशमलब ३० विन्दुमा पुगेको थियो । यो विन्दु हालसम्मकै उच्च हो । यसअघि २०७७ माघ २५ गते आइतबार नेप्से २ हजार पाँच सय २४ विन्दुमा पुगेर नयाँ रेकर्ड कायम गरेको थियो ।
यस दिन २०६ कम्पनीको ९२ हजार ७९ पटकको कारोबारमा १० अर्ब ६१ करोड ९१ लाख रुपैयाँ बराबरको २ करोड ११ हजार कित्ता शेयर खरिदबिक्री भएको छ।
कारोबार भएका १२ समूह मध्ये ५ समूह घटेका छन् अन्य ७ समूह बढेका छन् । सोमबार बैंकिङ ६२.७२, जीवन बिमा २११.३७, विकास बैंक ८६.४२, होटल फाइनान्स, अन्य र म्यूचुअल फण्डको समूह सूचक बढेपछि त्यसको रफ्तार नेप्सेमा परेको हो ।
सोमबार कारोबार रकममा पनि वाणिज्य बैंक समूहको बर्चश्व छ । प्रभु बैंकको सबैभन्दा धेरै ५८ करोड ४ लाख । नबिलको ३२ करोड २२ लाख छ भने नेपाल लाइफ इन्स्योरेन्सको ३१ करोड ६६ लाख रुपैयाँ बरारबको सेयर किनबेच भएको छ । उच्च कारोबार हुने १० कम्पनी मध्ये वाणिज्य बैंक समूहका ५ वटा छन् ।
नेपाल इन्फ्रास्टकचर डेभलपमेन्ट बैंक र चन्द्रागिरि हिल्सको प्राथमिक निष्काशनमा हालेको सेयर बाँडफाँड भएर नपरेको सेयरको रकम फिर्ता भएसँगै बजारले गति समाएको हो । बजारले नयाँ उचाई लिइरहँदा ओझेलमा परेको भनेर बाणिज्य बैंकको सेयर प्रति लगानीकर्ताको सधै गुनासो रहँदै आएको छ । तर, सोमबार भने अधिकांश बाणिज्य बैंकहरुको सेयर मूल्यले उचाई लिएको छ । यद्यपि, विगतमा बैंक बाहेकका कम्पनीहरुको जस्तो तीब्र उछाल भने छैन् ।
बैंकिङ्ग क्षेत्रतर्फ लगानीकर्ता लागेकाले पनि बजार सुधारको क्रम जारी रहने आँकलन गरिएपनि बजारमा जोखिम भने बढ्दै गएको छ । यस्तो अवस्थामा वित्तीय सूचकमा बलिया र शेयरमूल्य कम भएका कम्पनीको शेयरमा लगानी गर्न विज्ञहरुको सुझाव छ ।
सोमबार पनि ग्रामिण लघुवित्त विकास बैंकको सेयर मूल्य सबैभन्दा बढी ९.९२ प्रतिशतले बढेको छ । त्यसलाई पछ्याउँदै प्रभू बैंक ९.१७ प्रतिशत, प्रभू बैंक संस्थापक सेयर ८.७७ प्रतिशत, सनराइज बैंक ८.४५ प्रतिशत र माछापुच्छ«े बैंक ८.३९ प्रतिशतले बढेको छ ।
बजार बढे पनि अधिकांश लघुवित्त र जलविद्युत् कम्पनीको सेयर मूल्यमा गिरावट आएको छ ।
