काठमाडौँ । मंगलबार शेयर बजार सामान्य अंकले बढेको छ । नेपाल स्टक एक्सचेञ्ज (नेप्से) का अनुसार मंगलबार शेयर परिसूचक ५.४० अंकले बढेर १ हजार ६४३.०४ विन्दुमा पुगेको कारोबार बन्द भएको छ । यस्तै सेन्सेटिभ परिसूचक पनि १.१४ अंकले बढेर ३२६.६० मा पुगेको छ । यस कूल १९८ वटा कम्पनीको ७७ लाख ५७ हजार ३ सय ५३ कित्ता शेयर खरिदबिक्री हुँदा २ अर्ब २३ करोड ७९ लाख ६४ हजार ५ सय ७२ रुपैयाँको कारोबार भएको नेप्सेले जनाएको छ ।
स्टकका अनुसार कारोबार भएका कूल १२ उपसमूहमध्ये आज १० वटा उपसमूहको शेयर बढेको छ भने बाँकी २ वटा उपसमूहको शेयर मात्र घटेको छ ।
यस दिन टेलिकमको प्रतिकित्ता ७५१ मा १० करोड ३ लाख रुपैयाँ बराबरको सेयर किनबेच भएको छ । त्यस्तै, एनआईसी एसिया बैंकको प्रतिकित्ता ८ करोड ३४ लाख रुपैयाँ बराबरको सेयर कारोबार भएको थियो । त्यस्तै, प्राइम कमर्सियल बैंकको ८ करोड ४ लाख रुपैयाँ बराबरको सेयर कारोबार भएको नेप्सेले जनाएको छ ।
त्यसैगरी, मंगलबार ४ कम्पनीहरुको शेयर सकारात्मक सर्किट लेभलमा कारोबार भएको छ । विशाल बजार कम्पनी लिमिटेड, समीट लघुवित्त वित्तीय संस्था लिमिटेड, पाँचथर पावर कम्पनी लिमिटेड र शिवश्री हाइड्रोपावर कम्पनी लिमिटेडको शेयर सकारात्मक सर्किट लेभलमा कारोबार भएको हो ।
सेयर बजार बढेपनि केही कम्पनीले भने घाटा ब्यहोरेका छन् । खासगरी महालक्ष्मी विकास बैंक, दिब्यश्वरी हाइड्रोपावर लिमिटेड र युनियन हाइड्रोपावर कम्पनी लिमिटेडका लगानीकर्ताले गुमाएका छन् ।
