काठमाडौँ । सर्वोच्च अदालतले गैरकानुनी रुपमा पक्राउ गरिएका उज्यालो नेटवर्क डटकमका पत्रकारद्वयलाई आज थुनामुक्त गर्न आदेश दिएको छ । न्यायाधीशहरु ईश्वरप्रसाद खतिवडा र डा. आनन्दमोहन भट्टराईको संयुक्त इजलासले बन्दीप्रत्यक्षीकरणको आदेश जारी गरेको हो । प्रभात भन्ने दुर्गालाल लामा र अनिश भन्ने श्यामबहादुरलाई गैरकानुनी रुपमा थुनामा राखिएको भन्दै सर्वोच्च अदालतमा नेपाल पत्रकार महासंघ ललितपुर शाखाका सचिव रामहरि कार्कीले बन्दीप्रत्यक्षीकरनको रिट हालेका थिए ।
उज्यालो नेटवर्क डटकमका पत्रकार अनिश र व्यवस्थापक लामालाई प्रहरीले पक्राउ गरेको थियो । प्रधानमन्त्री केपी शर्मा ओली र भारतीय गुप्तचर निकाय (रअ) का प्रमुख सामन्त गोयलबीच भएको भनिएको विवादास्पद सम्झौताको प्रति र त्यससँग सम्बन्धित समाचार उज्यालो नेटवर्क डटकमले प्रकाशित गरेको थियो । फर्जी भनिएको उक्त सम्झौतापत्र प्रकाशित भएलगत्तै उज्यालो नेटवर्कले माफी मागेको थियो । प्रहरीले किर्ते कागजात तयार पारिएको आरोपमा अनुसन्धानका क्रममा भन्दै उनहरुलाई पक्राउ गरेको हो ।
प्रहरीले आफूलाई धरपकड गर्न खोजेको भन्दै उज्यालो नेटवर्कका सञ्चालकहरु उच्च अदालत पाटन पुगेका थिए । उच्च अदालतले तत्कालका लागि उनीहरुलाई पक्राउ नगर्नु भनेर अन्तरिम आदेश दिएको अवस्थामा प्रहरीले पक्राउ गरेको हो ।
तामाङको पक्षबाट वरिष्ठ अधिवक्ताहरु बोर्णबहादुर कार्की, रमणकुमार श्रेष्ठ, मुक्तनारायण प्रधान, अधिवक्ताहरु भक्तिराम घिमिरे, धर्मराज पाण्डे, करुणाकर मल्लिक, लोकेन्द्र वोली, सन्तोष भण्डारी, विजय हमाल र रामराज शाहले बहसले गरेका थिए भने सरकारको तर्फबाट उपन्यायधीवक्ता दशरथ पंगेनीले वहस गरेका थिए।
