हेटौँडा । सवारी चाप बढेपछि काठमाडौं–हेटौँडा आवतजावत गर्ने साना यात्रुवाहक सवारीसाधनले आजदेखि आउँदा र जाँदा फरक–फरक मार्ग प्रयोग गर्नुपर्ने भएको छ ।
स्थानीय प्रशासनका अनुसार १४ सिटभन्दा कम क्षमताका सवारीसाधनले हेटौँटाबाट काठमाडौं जाँदा भीमफेदी–कुलेखानी–सिस्नेरी–दक्षिणकाली मार्ग प्रयोग गर्नुपर्नेछ । त्यस्तै, काठमाडौंबाट हेटौँडा आउने सवारीसाधनले फर्पिङ–फाखेल–कुलेखानी–भीमफेदी मार्ग प्रयोग गर्नुपर्नेछ ।
जिल्ला प्रशासन कार्यालय मकवानपुरका प्रशासकीय अधिकृत सन्तोष सुवेदीका अनुसार मालवाहक तथा ठूला यात्रुवाहक सवारीसाधनले काठमाडौं जाँदा त्रिभुवन राजपथ र हेटौँडा फर्किंदा कान्ति राजमार्ग प्रयोग गर्नुपर्नेछ ।
पृथ्वी राजमार्गअन्तर्गत धादिङको कृष्णभीरमा सडक अवरुद्ध भएपछि हेटौँडा हुँदै काठमाडौं आवतजावत गर्ने सवारीसाधनको चाप बढेको छ । सवारीसाधनलाई छुट्टाछुट्टै मार्गबाट सञ्चालन गर्ने नयाँ व्यवस्थाले वैकल्पिक सडकमा हुने जाम तथा लामो समयसम्म सवारी रोक्नुपर्ने समस्या कम हुने प्रशासनको अपेक्षा छ ।
