हेटौँडा । मकवानपुरको भीमफेदी गाउँपालिका–६, जुरिखेतमा स्कार्पियो दुर्घटना हुँदा उच्च अदालत जनकपुरको अस्थायी इजलास वीरगंजका न्यायाधीश गोकर्ण डाँगीसहित ६ जना घाइते भएका छन् ।
काठमाडौँबाट हेटौँडातर्फ आउँदै गरेको प्रदेश–३–००२ झ ५१८३ नम्बरको स्कार्पियो आज बिहान जुरिखेतमा दुर्घटनामा परेको हो ।
स्कार्पियोमा चार पुरुष र दुई महिला सवार थिए । दुर्घटनामा घाइतेमध्ये एकजनाको अवस्था गम्भीर रहेको प्रहरीले जनाएको छ ।
घाइते सबैलाई उपचारका लागि हेटौँडा अस्पताल ल्याइएको थियो । उनीहरूलाई थप उपचारका लागि हेलिकोप्टरमार्फत काठमाडौँ लैजाने तयारी भइरहेको जिल्ला प्रहरी कार्यालय मकवानपुरका प्रहरी नायव उपरीक्षक माधवप्रसाद काफ्लेले जानकारी दिए ।
