काठमाडौं । पत्रकार किशोर श्रेष्ठलाई रिहा गर्न सर्वोच्च अदालतले परमादेश जारी गरेको छ ।
उनकी पत्नी सरस्वती श्रेष्ठले दायर गरेको बन्दी प्रत्यक्षीकरणको रिटमाथि सुनुवाइ गर्दै सर्वोच्चले श्रेष्ठलाई रिहा गर्न आदेश दिएको हो । अदालतले उनलाई हाजिरी जमानीमा छाडेर वा तारिखमा राखेर अनुसन्धान अघि बढाउन भनेको छ ।
न्यायाधीशद्वय नहकुल सुवेदी र बालकृष्ण ढकालको इजलासले श्रेष्ठलाई रिहा गर्न आदेश दिएको हो । जनआस्था अनलाइनमा प्रकाशित एक समाचार र तस्वीरका कारण वैयक्तिक गोपनीयताको हक हनन भएको आरोपमा प्रहरीले उनलाई गत साउन २७ गते निवासबाट पक्राउ गरेको थियो ।
त्यसयता उनलाई हिरासतमा राखेर अनुसन्धान भइरहेको थियो । सर्वोच्चको आदेशमा श्रेष्ठले समाचारमा प्रयोग गरेको तस्वीर जाहेरवालाले आफैं सामाजिक सञ्जालमा सार्वजनिक गरेको देखिएको उल्लेख छ । उक्त तथ्यलाई विपक्षीले खण्डन गर्न नसकेको पनि आदेशमा जनाइएको छ ।
