हेटौडा । मकवानपुरको भिमफेदीमा बुधबार साँझ स्कुटर दुर्घटना एकजना महिलाको मृत्यु भएको छ । एक जना घाइते भएका छन् ।
भिमफेदी–कुलेखानी सडकखण्ड अन्तर्गत भिमफेदी गाउँपालिकको वडा नम्बर ६ जुरीखेतमा स्कुटर दुर्घटना हुँदा काठमाडौं महानगरपालिका वडा नम्बर २७ महाबौद्धकी ६२ बर्षीय राज्य लक्ष्मी थापाको मृत्यु भएको हो ।
काठमाडौँबाट हेटौँडातर्फ आउँदै गरेको बागमती प्रदेश ०२–०२७ प ४८४२ नम्बरको स्कुटर आफै अनियन्त्रित भई दुर्घटना हुँदा स्कुटरमा सवार थापा र स्कुटर चालक ६५ बर्षीय शसिराज पाण्डे घाइते भएका थिए ।
थापाको उपचारको क्रममा हेटौँडामा मृत्यु भएको प्रहरीले जनाएको छ ।
स्कुटर सडकबाट झण्डै एकसय मिटर तल खसेको थियो । दुर्घटनामा घाइते भएका स्कुटर चालक पाण्डेको भने हेटौँडा अस्पतालमै उपचार भइरहेको छ ।
