रौतहट । आगामी मंसिर ४ मा हुने प्रदेश तथा प्रतिनिधिसभा सदस्य निर्वाचनमा जनता समाजवादी पार्टी (जसपा) सँग एमालेले गठबन्धन गरेको भन्दै रौतहटका नेता प्रभु साहले पार्टीको टिकट परित्याग गर्दै स्वतन्त्र उम्मेदवारी दर्ता गराएका छन्। उनले रौतहट-३ बाट प्रतिनिधिसभा सदस्य पदमा स्वतन्त्र उम्मेदवारी दर्ता गराएका हुन्।
नेकपा एमालेका प्रभावशाली नेता मानिएका साहले रौतहट-३ को निर्वाचन अधिकृतको कार्यालय कटहरियामा उपस्थित भई स्वतन्त्र रुपमा उम्मेदवारी दर्ता गराएका छन्।
गत निर्वाचनमा माओवादीको टिकटबाट प्रतिनिधिसभामा निर्वाचित भएर नेकपा विभाजनपछि उनी एमालेमा रहेका थिए।
आगामी मंसिर ४ गते हुने प्रदेश सभा र प्रतिनिधिसभाको निर्वाचनको लागि एमाले अध्यक्ष केपी शर्मा ओलीले जनता समाजवादी पार्टीसँग गठबन्धन गरेपछि पूर्वमन्त्री साह असन्तुष्टि जनाउँदै आएका थिए।
साहले स्वतन्त्र उम्मेदवारी दर्ता गराएपछि निर्वाचन क्षेत्र ३ अन्तर्गत ख का प्रदेश सभा सदस्यका लागि एमालेबाट टिकट पाएका कुन्दन कुशवाहाले पनि स्वतन्त्र मनोनयन दर्ता गराएका छन्।
जसपाबाट एमालेमा आएका किरण साह, लोसपाबाट आएका अजय गुप्ता र कांग्रेस छाडेर आएका राजेश चौधरीले टिकट नपाएपछि आफूले स्वतन्त्र उम्मेदवारी दिएको नेता साहले बताए । उहाँहरूलाई टिकट दिने वाचापछि पार्टीमा भित्राएको भए पनि पार्टीले टिकट नदिएको साहको भनाइ छ ।
क्षेत्र ३ मा सत्तागठबन्धनको तर्फबाट प्रतिनिधिसभा सदस्यमा माओवादीका धीरज पटेलले मनोनयन दर्ता गराएका छन्।
उता प्रदेश क निर्वाचन क्षेत्रमा एसका नागेन्द्र साह र ख मा कांग्रेस जिल्ला सभापति सुनील यादव जितेन्द्रले प्रदेश सभा सदस्यमा मनोनयन दर्ता गराएका छन्।
