काठमाडौं । सर्लाही सदरमुकाम मलङ्गवामा बुधबार साँझ गोली चल्दा एक भारतीय युवकको मृत्यु भएको छ ।
सदरमुकाम मलङ्गवा नगरपालिका–८, स्थित ओम पेट्रोल पम्प नजिकै अज्ञात व्यक्तिले प्रहार गरेको गोली लागेर भारत विसनपुर आधार पञ्चायत घर भएका अन्दाजी ३५ वर्षीय इन्दल महतोको मृत्यु भएको हो ।
महतो माथि बुधबार साँझ ७ः३० बजे तिर गोली प्रहार भएको स्थानीय प्रत्यक्षदर्शीले बताएका छन् ।
घाइते महतोलाई उपचारका लागि मलङ्गवास्थित प्रादेशिक अस्पताल ल्याउँदा चिकित्सकले मृत घोषणा गरेका प्रहरीले जनाएको छ ।
महतोलाई बीआर ३० ए ८५४५ नम्बरको मोटरसाइकलमा भारततर्फबाट आउँदै गर्दा मोटरसाइकलमै आइरहेका अज्ञात व्यक्तिहरूले गोली प्रहार गरेर फरार भएका छन् । गोरखापत्र दैनिकमा खबर छ ।
