काठमाडौं । नेपाल प्रहरीमा थप गरिएका तीनवटा पदका लागि अब बढुवाको प्रक्रिया शुरू भएको छ ।
यो प्रक्रिया शुरू भएसँगै प्रहरीमा वरिष्ठ प्रहरी नायब निरीक्षक ९वसई०, वरिष्ठ प्रहरी हबल्दार (वह) र सहायक हबल्दार (सह) मा बढुवाको बाटो खुलेको हो ।
सरकारले प्रहरी कर्मचारी नियमावली–२०७१ संशोधन स्वीकृत गरेसँगै थप गरिएका पदमा बढुवाका लागि बाटो खुलेको हो ।
केन्द्रीय प्रहरी प्रवक्ता वरिष्ठ प्रहरी उपरीक्षक (एसएसपी) विष्णुकुमार केसीले अबको १०–१५ दिनभित्र पदोन्नति गरिसक्ने बताए ।
तल्लो दर्जाका प्रहरी कर्मचारीलाई प्रोत्साहनस्वरूप आत्मबल बढाउन तीनवटा नयाँ पद सिर्जना गरिएको हो ।
कार्यसम्पादन मूल्याङ्कनभन्दा वरिष्ठताका आधारमा पदोन्नति तथा बढुवामा सिफारिस गरिने भएको छ ।
प्रवक्ता केसीले भने, “कारबाहीमा परेकाबाहेक प्रबल दाबेदारलाई वरिष्ठताकै आधारमा 'ब्याच’अनुसार बढुवा गर्ने तयारी भइरहेको छ ।"
पदोन्नति भएकाहरू दज्र्यानी चिह्न पहिरिएर २०७९ वैशाख ३० गते हुने निर्वाचनको सुरक्षामा खटिने छन् । वसईको तीन तारा, वहको तीन रेखामाथि छड्के अर्को रेखा र सहको दुईधर्के फुली हुुने छन् । ती पदमा पदोन्नति तथा बढुवाको प्रक्रिया अन्तिम चरणमा पुगेको छ ।
वरिष्ठ सईमा एक हजार ४१८, वरिष्ठ हबल्दारमा तीन हजार ७४८ र सहायक हबल्दारमा १५ हजार २४१ जनाको दरबन्दी स्वीकृत भएको छ । त्यस्तै सईको दरबन्दी दुई हजार ८७८, हबल्दारको ११ हजार २४१ र सिपाहीको ३० हजार ९६६ कायम गरिएको छ । करिब ७६ हजार प्रहरी जनशक्ति रहेको छ । गोरखापत्र दैनिकमा खबर छ ।
