ललितपुर । पठाओ राईडरलाई जबरजस्ती लुटपाट गर्ने कार्यमा संलग्न दुई व्यक्तिलाई प्रहरीले पक्राउ गरेको छ ।
गएराति काठमाडौंको कोटेश्वरबाट पठाओ राइडर प्रविन राईलाई अपहरण गरेर ती युवाले मोटरसाइकल लुटेका थिए । उनीहरूले कोटेश्वरबाट ललितपुरको धापाखेलस्थित आँखादहमा लगेर राइडरको हाँतखुट्टा तथा मुखमा टेप बाँधेर मोटरसाइकल लुटेको महानगरी प्रहरी वृत्त सातदोबाटोले जनाएको छ ।
ती दुबैजनालाई काठमाडौंको बलम्बुबाट नियन्त्रणमा लिइएको प्रहरी वृत्त सातदोबाटोका प्रमुख, डीएसपी दिनेश घिमिरेले जानकारी दिए । पक्राउ पर्नेमा सुमन तामाङ र मिनराज राई छन् ।
डिएसपी घिमिरे नेतृत्वको टोलीले काठमाडौंको बलम्बु स्थिति चन्दागिरी रिकन्डिसन सोरुम नजिकैबाट मोटरसाइकल बेच्दै गरेको अवस्थामा पक्राउ गरेको हो ।
गएराति १ः३० बजे एकजना युवक कोटेश्वरबाट पठाओ चढेर गएका थिए । उनले साथीलाई धापाखेलमा बोलाएर योजनाबद्ध रुपमा लुटेको अनुसन्धानबाट खुल्न आएको प्रहरीको भनाइ छ । धापाखेलस्थित एकान्त ठाउँमा लगेपछि दुबैले राइडर प्रविन राईको हातखुट्टा डोरीले र मुखमा टेप बाँधेर बोल्न नसक्ने बनाएर छाडेका थिए । स्थानीयले प्रहरी कन्ट्रोल रुपमा फोन गरी राईडरको अवस्था जानकारी दिएका थिए ।
