धादिङ । धादिङ जिल्लाको नेत्रावती गाउँपालिका वडा नं. ४ हल्दारे बस्ने ७२ वर्षीया सुकमाया गुरूङको धारिलो हतियार खुर्पा प्रहार गरी हत्या गरेको अभियोगमा सोही ठाउँ बस्ने ३६ वर्षीय मंगल गुरूङलाई शुक्रबार साँझ प्रहरीले पक्राउ गरेको छ ।
सुकमाया आफ्नै घर नजिक सडकमा मृत अवस्थामा फेला परेको भन्ने खबर प्राप्त हुनासाथ जिल्ला प्रहरी कार्यालय धादिङ र प्रहरी चौकी टोड्केबाट खटिएको प्रहरीले घटनाको अनुसन्धानको क्रममा मंगलको संलग्नता रहेको खुल्न आएपछि उनलाई पक्राउ गरेको हो । साथै थप सोधपुछको क्रममा पुरानो रिसइवी तथा बाख्राले बाली खाएको विषयलाई लिएर खुर्पा प्रहार गरी हत्या गरेको खुल्न आएको छ ।
मंगल गुरुङले सुकुमाया गुरुङको आफूले हत्या गरेको भन्दै उनको दिदीलाई सुनाएका थिए । उनको दिदीले उक्त घटना गाउँका अरुलाई सुनाएपछि सो बारेको सूचना प्रहरीमा आएको थियो । घटनास्थलमा घरछिमेकी आए पनि मंगल आएका थिएन । प्रहरीलाई मंगलप्रति शंका लागेपछि खोजी गर्दा गोठमा लुगि बसेको अवस्थमा नियन्त्रणमा लिएको जिल्ला प्रहरी कार्यालय धादिङका प्रहरी प्रमुख प्रहरी उपरीक्षक गौतम मिश्रले जानकारी दिए ।
यस सम्बन्धमा प्रहरीले आवश्यक अनुसन्धान गरिरहेको प्रहरी उपरीक्षक मिश्रको भनाई छ ।
