काठमाडौं । दशैं शुरू भएसँगै उपत्यका छाड्ने यात्रुको संख्या बढ्न थालेको छ । यही असोज १ देखि ७ गतेसम्म भित्रिने र बाहिरिने यात्रु बराबर थिए । अहिले भने बाहिरिने यात्रु बढिरहेको महानगरीय ट्राफिक प्रहरी महाशाखाले बताएको छ ।
काठमाडौं भित्रिने र बाहिरिने यात्रुको संख्या विश्लेषण गर्दा अहिलेसम्म औपचारिक रूपमा १ लाखभन्दा बढी यात्रु काठमाडौंबाट बाहिरिएका छन् । प्रहरीको अभिलेखमा रहेका बाहेक समेत धेरै यात्रु बाहिरिएका छन् ।
महाशाखाका प्रमुख प्रहरी वरिष्ठ उपरीक्षक जनक भट्टराईले विस्तारै यात्रु बाहिरिने क्रम बढिरहेको र दशैं बिदा शुरू भएपछि भने यो संख्या अझै बढ्ने बताए । ‘अहिलेसम्म सामान्य रूपमा बढिरहेको छ, अब थप बढ्छ,’ उनले भने, ‘यात्रुको सहजताका लागि हामीले चुस्त ट्राफिक व्यवस्थापन मिलाएका छौं, बाहिरिने यात्रुका सहज व्यवस्थापनका लागि रातदिन नभनी प्रहरी खटाइएको छ ।’
असोज १ देखि २२ सम्ममा १ लाख ४२ हजार २२७ सवारीसाधनमा ७ लाख ७६ हजार ३७१ यात्रु भित्रिएको तथ्यांक छ । सोही अवधिमा १ लाख ४३ हजार ७७३ सवारी साधनमा ८ लाख ७० हजार ४९६ यात्रु बाहिरिएको महाशाखाले बताएको छ ।
यद्यपि रिजर्भ गरेर जाने यात्रुको संख्या यसपालि बढी छ । त्यसरी जानेको संख्या भने प्रहरीको अभिलेखमा रहँदैन । साथी वा आफ्नो परिवार मिलेर साना गाडी रिजर्भ गरेर घर जाने प्रचलन यसपटक बढी देखिएको महाशाखाका प्रहरी निरीक्षक जितेश दाहालले जानकारी दिए ।
यसपटक असोज ११ गतेदेखि गाडीको अग्रिम टिकट विक्री खुला गरिएको थियो । अहिले पनि अनलाइन वा प्रत्यक्ष रूपमा टिकट काट्ने यात्रुको चाप बढी छ । त्यस्ता काउन्टर तथा यात्रुको भिडभाड हुने क्षेत्रमा प्रहरी परिचालन गरिएको महाशाखाले बताएको छ ।
प्रहरीले उपत्यकाका मुख्य चोकमा यात्रु सहायता कक्षा स्थापना गरी सेवा दिइरहेको छ । माइकिङ गरेर यात्रुलाई सचेत गराउने, सुरक्षित यात्राका लागि आग्रह गर्ने गरिरहेको छ । कोभिड–१९ का कारण उपत्यकामा विगतका वर्षमा भन्दा मानिस कम रहेको बताइएको छ ।
चाडबाडका बेला चोरी तथा आपराधिक घटना हुन सक्ने भएकाले त्यसको निगरानीका लागि र शान्तिसुरक्षा कायम गर्न ७७ ओटै जिल्लामा विशेष सुरक्षा योजना बनाएर लागू गरिएको प्रहरी प्रधान कार्यालयले बताएको छ ।
प्रहरी प्रवक्ता वरिष्ठ उपरीक्षक वसन्तबहादुर कुँवरले सादा पोशाकमा समेत प्रहरी परिचालन गरेर ठगी, कालोबजारी, चोरी आपराधिक क्रियाकलाप नियन्त्रणमा प्रहरी खटाइएको जानकारी दिए । चाडबाडका बेला आफै पनि सावधान हुन र केही समस्या घटना परेमा नजिकको प्रहरी कार्यालयमा सम्पर्क गर्न प्रहरी प्रधान कार्यालयले अनुरोध गरेको छ । रासस
