पूर्वशिक्षामन्त्री पौडेलको अन्त्येष्टि

चितवन, जेठ ३१ । हृदयघातका कारण निधन भएका पूर्वशिक्षामन्त्री धनिराम पौडेलको अन्त्येष्टि आज गरिएको छ। आफ्नो गृहनगर चितवनको माडी नगरपालिका–५ को मगोई खोलामा शुक्रबार अपरान्ह अन्त्येष्टि गरिएको हो।

यसअघि नेकपाका अध्यक्ष एवं पूर्वप्रधानमन्त्री पुष्पकमल दाहाल प्रचण्ड, गृहमन्त्री राम बहादुर थापा वादल, शिक्षामन्त्री गिरीराजमणी पोखरेल, नेकपा नेताहरू बामदेव गौतम, नेकपा प्रवक्ता नारायकाजी श्रेष्ठ, देवप्रसाद गुरुङ, अमिक सेरचनलगायतले अन्तिम श्रद्धाञ्जलि दिएका थिए।

यस्तै, प्रदेश, जिल्ला तथा स्थानीय नेता कार्यकता साथै सर्वसाधारणले पनि श्रद्धाञ्जलि दिएका थिए। अन्त्येष्टि गर्नुपूर्व वसन्तपुर बजारमा निकालिएको शव यात्रामा नेता, कार्यकर्ता तथा हजारौँ सर्वसाधारणको सहभागिता रहेको थियो।

पौडेलको आफ्नै निवास चितवनको माडी नगरपालिका ३ वसन्तपुर रमाइलो डाँडामा ५३ वर्षको उमेरमा हृदयघातका कारण निधन भएको हो।

घरमा शुक्रबार बिहानको समयमा हृदयघात भएपछि स्थानीय बगौडा अस्पतालमा लैजाँदै गर्दा करिव ७ बजेतिर बाटोमै निधन भएको हो ।

पौडेल नेपाल कम्युनिष्ट पार्टी (नेकपा) का केन्द्रीय सदस्य हुन् । २०२३ साल कार्तिक ४ गते जन्मिएका पौडेलका श्रीमती, बुबा आमा र २ छोरी रहेका छन्।

प्रकाशित मिति: शुक्रबार, जेष्ठ ३१, २०७६ /Friday, June 14th, 2019, 7:17 pm