बैंकहरुबीच ब्याज बढाउन प्रतिस्पर्धा, हेर्नुहास् कुन बैंकको कति ?

काठमाडौं, मंसिर २० । वाणिज्य बैंकहरुबीच अहिले ब्याज बढाउन प्रतिस्पर्धा शुरु भएको छ । बैंकर्स संघले गतमंगलबार ब्याजदरबारे नयाँ निर्णय गरेसँगै बैंकहरुबीच ब्याज बढाउन प्रतिस्पर्धा शुरु भएको हो।

आफ्नो बैंकमा भएको रकम अरु बैंकले तान्ने डरले यतिबेला बैंकहरु चिन्तित छन् । गत मंगलबारदेखि बाणिज्य बैंकहरुले मुद्दती खातामा धमाधम ब्याजदर बढाउन थालेका हुन्। मंगलबारदेखि शुरु भएको ब्याजदर बढाउने सिलसिलामा तीन दिनभित्र पाँच वटा बैंकले ब्याजदर बढाएका छन् ।

मंगलबार नै जनता बैंकले मासिक ब्याज पाँउने गरी जनता मुद्दती निक्षेपमा वार्षिक १२ प्रतिशत ब्याज दर सार्बजनिक गरेको थियो । त्यसपछि बुधबार माछापुच्छ्रे बैंकले पनि ब्याज बढाएको थियो । माछापुच्छ्रे बैंकले व्यक्तिगत मुद्दति निक्षेपको ब्याजदर साढे १२ प्रतिशत पुर्याएको छ। प्रकाशित ब्याजमा थप आधाप्रतिशतसम्म ब्याजदर बढी दिन सकिने भएकोले बैंकको ब्याज १३ प्रतिशतसम्म पुग्नसक्छ ।

बिहिबार थप ३ वाणिज्य बैंकले नयाँ ब्याजदर सार्बजनिक गरेका छन् । जस अनुसार मेगा बैंकले न्युनतम १ लाखको व्यक्तिगत मुद्दती निक्षेपमा १२ दशमलव ५० ब्याज दिने भएको छ। प्रकाशित ब्याजमा थप आधाप्रतिशतसम्म ब्याजदर बढी दिन सकिने भएकोले बैंकको ब्याज १३ प्रतिशतसम्म पुग्ने पक्का भएको छ । त्यो भन्दा कमको बचतमा भने बैंकले १० प्रतिशत ब्याज दिने भएको छ । त्यस्तै संस्थागत निक्षेपकर्ताहरुलाई ९ प्रतिशत ब्याजदर सार्बजनिक गरेको छ ।

त्यस्तै कुमारी बैंकले पनि न्यूनतम मौज्दात रु १० हजारमा व्यक्तिगत निक्षेपकर्ताको लागि १३ प्रतिशत ब्याज घोषणा गरेको छ । प्रकाशित ब्याजमा थप आधाप्रतिशतसम्म ब्याजदर बढी दिन सकिने भएकोले बैंकको ब्याज १३ दशमलव ५० प्रतिशतसम्म पुग्ने पक्का छ ।

बैंक अफ काठमाडौँले व्यक्तिगत मुद्दती निक्षेपमा १० प्रतिशत नयाँ ब्याजदर कायम गरेको छ ।

नेपाल राष्ट्र बैंकका अनुसार अहिले बाणिज्य बैंक, विकास बैंक र फाइनान्स कम्पनीहरुसँग गरि कुल २९ खर्ब रुपैयाँ निक्षेप छ। यसमध्ये ब्यक्तिगत निक्षेप १५ खर्ब ९५ अर्ब रुपैयाँ छ। अहिले कुल निक्षेपको ४५ प्रतिशत मुद्दति खातामा पैसा छ।

यसै बीच बाणिज्य बैंकहरु धमाधम ब्याजदर बढाएपछि विकास बैंकहरुलाई पनि आफ्नो निक्षेप खोस्ने चिन्ता छाएको छ । त्यसकारण विकास बैंकहरु पनि ब्याजदर बढाउनतिर लागेका छन् ।

ब्याज बढाउने प्रतिस्पर्धाले निक्षेपकर्तालाई फाइदा हुने भए पनि ऋणीहरु भने ठूलो मारमा पर्ने भएका छन । निक्षेपमा ब्याज बढेसँगै ऋणको पनि व्याज बढ्ने निश्चित छ ।

प्रकाशित मिति: बिहिबार, मंसिर २०, २०७५ /Thursday, December 6th, 2018, 1:10 pm