ओली सरकार आएपछि शेयर बजार तीन वर्ष यताकै न्युन विन्दूमा !

काठमाडौं, मंसिर ।
शक्तिशाली सरकार गठन भएदेखि लगातार गिरावट आइरहेको शेयर बजार बुधबार तीन वर्ष यताकै न्यून विन्दूमा पुगेको छ । बुधबार एकैदिन २२ अंकले बजार घटेर नेप्से परिसूचक १११८ विन्दूमा कायम भएको छ, यो २०७२ साल मंसिर महिनाको भन्दा पनि कम हो । तत्कालिन अवस्थामा भूकम्प, भारतले लगाएको नाकाबन्दीका कारण शेयर बजार यति कम भएको थिएन ।

शेयर बजार विश्लेषक अनलराज भट्टराई सरकारले आर्थिक नीति चुस्त बनाउन नसक्दा र बैंकहरु नाफामुखी बन्न खोज्दा शेयर बजारमा लगानीकर्तामा मनोबैज्ञानिक त्रास देखिएको बताउँछन् ।
आर्थिक नीतिलाई तत्काल सुधार नगर्ने हो भने यसले भंयकर रुप लिन सक्ने विश्लेषक भट्टराईले विश्लेषण गरे ।
नयाँ सरकार गठनदेखि मुश्किलले एकदुई पटक बढ्नुबाहेक शेयर बजारमा सुधार आएको छैन । पछिल्लो दिन खासगरी बीमा र माइक्रोफाइनान्सको समूहका लगानीकर्ताले बढी गुमाएको देखिन्छ ।
फागुनदेखि अहिलेसम्म एक खर्ब भन्दा बढी लगानीकर्ताले गुमाएका छन् । नेपाल बैंकले बाणिज्य बैंकहरुलाई चुक्ता पुँजी ८ अर्ब पुर्याउन वाणिज्य बैंकहरुलाई दिएको निर्दैशन अनुसार प्राय सबै सबै बैंकले उक्त पुँजी पुर्याइसकेका छन् ।

बैंकर्स एसोसिएसनले व्यक्तिगत मुद्दती खातामा राख्दै आएको व्याजदरको सीमा हटाएसँगै बुधबार नेप्सेमा उच्च गिरावट आएको हो। यसअघिसम्म साढे १० प्रतिशतको सीमा रहेकोमा व्यक्तिगत मुद्दतीमा बैंकहरुले साढे १२ प्रतिशतसम्मको व्याजदर दिन थालेका छन्।
सरकारले नियामक निकायमार्फत कडाईका साथ पुँजी बजार सुधारका योजना कार्यान्वयन गर्न नसकेको भन्दै लगानीकर्ताको एक समूह आइतबारदेखि नेप्से परिसरमा रिले अनसन बस्ने भएको छ ।

अर्थमन्त्री डा. युवराज खतिवडाको राजीनामा माग गर्दै उनीहरु अनसनमा बस्ने भएका हुन्।

प्रकाशित मिति: बुधबार, मंसिर १९, २०७५ /Wednesday, December 5th, 2018, 9:39 pm