भासिएको ठाउँमा वर्षापछि भित्तो काट्न सुझाव

सांकेतिक तस्बिर

चितवन, असार २९ । नारायणगढ–मुग्लिन सडकखण्डको गाईघाट नजिक सडक भासिएको ठाउँको विस्तृत अध्ययन गर्न विज्ञ समूहले सुझाव दिएको छ ।

गत मंगलबारदेखि भासिन शुरु गरेको उक्त ठाउँको बुधबार स्थलगत अध्ययन गरेको भूगर्वविद् अच्यूत कोइरालाको नेतृत्वको विज्ञ समूहले आज प्रतिवेदन बुझाएको हो ।

प्रतिवेदनमा अहिले तत्काल सडक एकतर्फी सञ्चालन गर्न सुझाव दिइएको छ । वर्षात घटेपछि भित्तो काटेर दुईतर्फी सवारी सञ्चालन गर्न उपयुक्त हुने पनि प्रतिवेदनमा उल्लेख छ । दुईतर्फी सवारी आवागमनका लागि छ मिटर हाराहारीमा भित्तो काट्नुपर्ने हुन्छ । सो ठाउँमा भिरालो जमिन रहेकाले चार मिटर अग्लो ठाउँबाट भित्तो काट्न सकिने नारायणगढ–मुग्लिन सडक आयोजनाले जनाएको छ । सो ठाउँमा ३५ मिटर हाराहारी लामो क्षेत्रमा भित्तो काट्नुपर्ने हुन्छ ।

नारायणगढ–मुग्लिन सडक आयोजनाका परामर्शदाता कम्पनीले आजै मात्रै प्रतिवेदन आयोजनालाई बुझाएको छ । आयोजनाका प्रमुख रोहितकुमार बिसुरालले प्रतिवेदन अध्ययन गरेपछि काम अगाडि बढ्ने बताउनुभयो । विज्ञ समूह नेपालमा पनि रहेकाले सोही समूह प्रयोग गर्ने वा विदेशबाट झिकाउने भन्ने विषयमा पछि छलफल हुने उहाँले बताउनुभयो ।

कोइरालाको प्रतिवेदनमा सो ठाउँमा सन् २००४÷२००५ मा २० मिटर भित्र पुग्ने गरी रक स्वायल एङ्करिङ गरिएको र सो एङ्करिङमा समस्या आएको हुनसक्ने पनि जनाइएको छ । त्यतिबेला फ्रान्सबाट रड झिकाएर एङ्करिङ गरिएको बिसुरालले बताउनुभयो ।

सडक भासिने क्रम बढ्दै गएपछि गत मंगलबारदेखि नै सडक एकतर्फी सञ्चालनमा ल्याइएको छ । सो स्थान नारायणगढबाट १७ किलोमिटर मुग्लिनतर्फ पर्दछ । सडकको ३० मिटर लम्बाई र छेउबाट आठ मिटर चौडा भाग भासिएको हो ।

प्रकाशित मिति: शुक्रबार, असार २९, २०७५ /Friday, July 13th, 2018, 7:21 pm