यस कारण शेयर बजार विहीबारको बढ्यो

काठमाडौं, जेठ ३१ । जेठ महिनाको अन्तिम दिन नेप्से बढेर बन्द भएको छ । कारोबार शुरु भएदेखि बढेको बजार अन्त्यसम्म बढेर बन्द भएको छ । विहीबार शेयर बजार ५ दशमलव २३ अङ्क बढेर १ हजार २ सय ४७ दशमलव ३० विन्दुमा पुगेर बन्द भएको छ ।

कारोबार भएका नौ समूहको परिसूचकमा बीमा समूहको परिसूचक बोहक बाँकी सबै समूहको परिसूचक बढेको छ । उत्पादन तथा प्रशोधन समूहको परिसूचक २ दशमलव १ प्रतिशतले बढेको छ भने जलविद्युत् र होटल समूहको परिसूचक १ प्रतिशतभन्दा बढीले बढेको छ । १ सय ६५ कम्पनीको ४ हजार ७ सय ५६ पटकको व्यापारमा ९ लाख १२ हजार ७ सय ५० कित्ता शेयरको रू. ३१ करोड ८२ लाख बराबरको शेयर कारोबार भएको छ ।

नेप्सेमा सर्वाधिक शेयर कारोबार हुने १० कम्पनीमा प्रभु बैङ्कको संंस्थापक तर्फको शेयर प्रतिकित्ता रू. १ सय ६० मा रू. १ करोड ९५ लाख बराबरको कारोबार भएको छ ।

उन्नती माइक्रोफाइनान्स वित्तीय संस्था लिमिटेडको शेयर मूल्य १० प्रतिशतले बढेको छ । साथै, राधि विद्युत् कम्पनीको शेयर मूल्य ९ दशमलव ८५ प्रतिशत र नेपाल हाइड्रो डेभलपरको ९ दशमलव ६९ प्रतिशतले बढेको छ ।

त्यसैगरी, जेविल्स फाइनान्सको शेयर मूल्य ३ दशमलव ७० प्रतिशतले घटेको छ ।

पाँच ओटा ब्रोकर कम्पनीमा नेपाल स्टक एक्सचेन्जले अनलाइन कारोबार परीक्षण गर्न निर्देशन दिएको छ । जेठ मसान्तभित्र सबै तयारी पूरा गरी परीक्षण गर्ने काम शुरु भएको छ । परीक्षण सफल भएपछि छिटै अनलाइन कारोबार गर्न पाउने आशाले पनि बजार बढेको लगानीकर्ता बताउँछन् ।

प्रकाशित मिति: बिहिबार, जेष्ठ ३१, २०७५ /Thursday, June 14th, 2018, 9:42 pm